Anjeitar

I sien marcaçon nien abiso, alhá ben un die, por algue mesquito i ansigneficante, l que siempre ls ouniu i lhigou sfumou-se.

L antendimiento que fiu l adobe de la harmonie al lhargo de muitos i muitos anhos çfai-se cumo miolho sgodado na palma de las manos para quemido de piticos.
Aqueilha amizade parede dobeira que fui l’abrigada de muitas alegries i terminaçones sbarrulha-se. Tantas festicas serbidas, carinos, eimoçones bibidas i çtribuidas, segredos partilhados i buidos an quemun cul frescor de la cunfiança, ounhindo las maleitas i anxabonando la spráncia de dies melhores, percurando la fartura éran até ende un solo cuorpo.

Fui siempre assi, até esse anstante que tubo l poder de matar todo, de alhebantar las melhores i piores dúbedas, spertar l çcredito, chamar la çcunfiança, anchoquecer l afeto i açagar la stima. Poner las percuras que até eiqui nun fúrun neçairas, perdiu-se la magie l ancanto, l gusto i bien querer, l deseio arrefeciu.

Mas las cousas nun se quédan porqui, las palabras nun sálen l siléncio toma cunta, l oulhar queda çtante i perdido, ls dies de nomeada pérden balor, las ganas de star eili scápan-se. Ye ua delor sien doler, ua maleita sien trato, caleija para se quedar solo, remonia la suidade de l que eisistiu.

Rechina la delor de nun ser capaç de birar al para trás, ampeçar de nuobo, matar la baidade, bencir l ourgulho, tirar las teimas, eiducar de nuobo para sembrar l antendimiento.

Mas la bida ye assi, l honte yá fui, nun l squecer nun debe acontecer, del sacar l melhor para cuntinar.