Tierra abençonada

Hai quien diga que quando un mirandés se muorrie i iba pa l paraiso nun stranhaba nada.

Porque na sue tierra habie todo de buono, fartura i lhibardade, la sue giente ye la mais spitaleira, capaç de botar ua mano quando i a quien mais precisar. L termo ye rico, daba-le l pan i las colheitas pa tener un bun cebado, respiraba l aire lhimpo i puro de l praino.

Por esso quando un mirandés s’íba desta para melhor, i só aqueilhes que íban adreito al cielo ye que nun ponien ls pies ne l paraíso, sentien-se cumo an sue casa.
Naide me l dixo, mas tamien alhá ne l paraíso la chabe debe quedar na puorta, tamien quando ua pessona besita outra siempre se le ouferece un muordo i ua pinga, ls mais nuobos recíben de bun agrado i cun respeito ls reparos benidos de la spriéncia de ls mais bielhos, séian parientes ou nó, quando a ua familia l pan s’acaba hai ua bezina que dá ua fogaça até la próssima fornada, l pariente ampresta l banho pa l die de la bindima i la mesma alquitarra fai l’augardiente de todos.
A ser assi porquei un mirandés habie de stranhar la demuda?

Mas you digo-bos-lo quando stranha.
Quando un mirandés yá nun bibe alhá hai muitos anhos i todos essas seinhas i reglas de buossa bezinança i cunfiança nun ancuntra, son assi a modos de cousas que yá fúrun, cousas doutros tiempos, cousas que até quédan mal agora, pochas cumo maçanas caídas ne l chano, cumo nabina que perdiu la balidade. Quando bibe nua tierra sien marcos adonde quienquiera fai lei cumo cardos i spineiros nun scadal, quando la zoumanizaçon tomou cunta de todo, la regla maior ye ser purmeiro mesmo que seia ancarrapitado ne l sou melhor camarada, quando l trabalho, dedicaçon i eiducaçon nun son lhebados an cunta i l que cunta ye l’asparecéncia nien que esso seia tan malo i tan feio cumo un arremedo.

Cumo nanhua suorte dá bun pan se nun fur bien relbada, bimada, stercada i arricada, tamien nanhua tierra ye paraíso sien giente sana. A eilhas se ten de botar las culpas ou dar agabones se l merecíren.