Pulas uito de la manhana, l die porqui nun staba grande cousa, ora ancubierto ora scampado assi a modos de nun saber cumo se quier quedar. Nun ye solo el, tamien you nun stou grande cousa de feitiu. Sien saber l que fazer, agarrei-me a botar estas palabras a ber se passa este zánimo, esta falta de jeito para ancarreirar todas estas horas que fáltan até la nuite.
Mas nun debie ser assi cumigo, tengo rezones de sobra para que este die fusse bien çfrente, stubisse el de buona ou mala cara, mas un home nun ye duonho de l sou çtino. Puode ser berdade que las cousas l mais de las bezes son cumo nós queremos que séian, cumo mos agarramos a eilhas i las tocamos palantre. Mesmo que un pense que l mundo sperta de piernas botadas al aire, solo para mos anrezinar, mos sfuracar l’alma.
Ua beç, mie abó de las saias cuntou-me ua cuonta inda you andaba na scuola. Era tamien un daqueilhes dies an que nun tenie ganas nanhuas d’agarrar na sacuola de la piedra i de ls lhibros. Quando eilha biu que las ganas éran poucas dixo-me: nunca fagas l que l tou cuorpo quier, cuntraria-lo, s’el nun quier ir-se a la scuola bota-te nua figida até alhá, bás a ber que quando alhá stubires será un de ls melhores dies. Assi fui, la perguícia spantou-se i todo corriu de feiçon.
Bárias bezes me lhembro dessa cuonta de mie abó Felisbina. Todo na bida ten remédio, todo s’arregla quaije siempre, ye ua queston de tiempo, tenemos ye que ser nós a remendar ls nuossos trapicos, mesmo sabendo que hai panho que pouco aguanta de tan sgudado i çfeito.
I assi cumo ampeçei, fecho: l tiempo i you talbeç inda hoije quedemos de buona cara se seguir l cunseilho que me cuntórun.
4 comentários:
Quando ampecei a dar scuola éran esses ls cadernos - la piedra, que se apagaba cun cuspinha i cula manga, ls que teníen mangas, porque muitos apagában cun la mano i traien la maça de la mano siempre negra.
Mas gustei de l testo, bien screbido i que me fizo pensar que era you nun die cumo esse.
Abraço
Buonas tardes Faustino,
Essas carteiras i la piedra fai-me lhembrar ls mius tiempos de scuola.
I tal cumo dizes quantas bezes nun apetecie muito ir a la scuola, mas ls nuossos pais tal cumo tue abó Flisbina dában ua upa i alhá íbamos nós todos campantes.
Inda me lhembro de la tie Flisbina santada a la selombra de ls uolmos na beiga de Belharino. Agora yá nun hai niem uolmos nien beiga.
Un abraço,
Francisco Domingues
Biba, buonas nuites, Foustino!
Sabeis, a mi nun fui mie bó, mas un cuntou-me ua beç ua cunta para you me lhembrar deilha ne ls dies an que me sentisse "an baixo". Dixo-me assi: quando te sentires triste ó zanimado ó que nun bás a ser capaç, tenes que te lhembrar que tu sós l spermatozoide que ganhou la corrida!... i mira que diç que yeran melhones!
Abraço
Gustei de ls buossos comentairos.
-Era berdade amigo Almendra, la cuspinha era amiga de rico i probe.
-Amigo Francisco cun pena de to l mundo yá nun hai beiga nien uolmos para star i dar selombra, mas stan las nuossas lhembráncias.
-Puis amigo Tortulhas essa bitória de l spermatozoide ye la bercion moderna de la cuonta, que mie abó l mais cierto tal cumo you nun la coincie, nesse tiempo inda nun se cuntában cuontas salidas de la ciéncia.
Gustei deilha.
Abraços
Enviar um comentário