22/01/09

La lhógica de Einstein



Dous ninos stában a patinar nun lhago cun carambelo de l´Almanha. Yera ua tarde frie i anubrada i ls ninos jogában sien niun cuidado.
Nisto , l carambelo scachou-se i un deilhes dou ua chimpa, quedando antalhado na racha que se fizo.
L outro nino, al ber l sou amigo preso i a quedar anregilado, çcalçou un de ls patins i ampeçou a martelhar l carambelo cun toda la sue fuorça, anté que conseguiu scachá-lo i lhibartar l amigo.
Quando ls bumbeiros chegórun i bírun l que habie acuntecido, preguntórun-le:
- Cumo conseguiste fazer isto? Ye ampossible que tengas conseguido scachar l carambelo, sendo inda tan pequeinho i cun uas manos tan andebles!
Nesse antretiempo, passaba pul lhugar l génio Albert Einstein i quemantou:
- You sei cumo ye que el cunseguiu?
Y todos preguntórun:
- Anton puodeis-mos dezir cumo?
- Ye fácele, arrespundiu Einstein.
- Nun habie naide alredror del, pa l dezir que nun iba a ser capaç.
"Dius fiç-mos purfeitos i nun scuolhe ls capazes, capacita ls scolhidos".
Fazer ou nun fazer algo, solo ten a ber cun la nuossa buntade i preserberança.
(Albert Einstein)

Taduçon de Francisco Domingues


Moral de la cuonta

Tenemos que mos preacupar mais cun la nuossa cuncéncia i menos cun la nomeada. Porque nós somos l que la nuossa cuncéncia ye, i la nuossa nomeada ye l que ls outros pensan de nós. Y l que ls outros pensan de nós ye un porblema deilhes.


2 comentários:

leonardo antao disse...

Amigo Francisco
Fazieste bien an mos dar a coincer esta de Einstein “fazer ou nun fazer algo, solo ten a ber cun la nuossa buntade i preserberança”. Registro-la, porque me parece mui amportante para bencir na bida. Sin la coincer, tengo-la aplicado na mie bida i cuntinuarei a aplicá-la, anté que Dius queira.
Quanto a la preocupaçon cula cuncéncia, tamien cuncordo cuntigo, ambora antenda que naide puode tener cuncéncia solo, la cuncéncia fai-se no confronto cun ls outros, i por esso “l que ls outros pensan de nós nun me parece ser solo un porblema deilhes, mas tamien nuosso.
Un abraço,
Leonardo

Abelhon disse...

Buonas tardes

Nun bonda crer no ampossible mas se naide acraditar que ye possible l ampossible d'onte, todo será ampossible.
Cume diç l ditado: "se ye possible stá feito! L'ampossible habemos de l cunseguir!"

Abraços