Gusto de registrar

Inda tengo uas patatas i uas berçicas para poner al lhume. Estas fúrun las palabricas que salírun de la boca daqueilha tie que quedou apartada de to l mundo naqueilha pobaçon por bias de ls nebones que caírun alhá ne ls cerros Stramuntanos. Quando las ajudas chegórun c'un garrafon d’auga i le percurórun l que habie quemido i cumo se habie gobernado solica nestes redadeiros dies, tan çfigurados.
Scassas son las palabras de quien bibe i siempre stubo squecido por esse pertual afuora, por essas ancuostas i muntanhas, mas quaije siempre son a la medida de las ajudas que le chégan. Todo mundo sabe, puis ye ua relidade bien coincida i nuossa, que nun ye perciso que béngan dies an que l cielo çpeije farrapos bancos que an poucas horas atolha to ls caminos i carreirones i deixa l termo cumo un lhançol de lhino. Que hai tanta i tan pessona solica, sien tener cumbibo sien tener lhigaçon a la cibelizaçon...
Mas las repuostas, l mais de las bezes, son d’ouro, nun son çfamantes, nun dan quinaus, nun son d’ampuntar, quien querga ber bei que son de pessonas que anrijórun ls uossos i caldeórun l sou calantric na frauga de la bida. Las falas son simpres, sien rábia por nada nien por nadie, nien acontra a quien nun le dá balor, nien quien ls squeciu, son puras cumo l aire que lhimpa estes outibales, sálen-le de l’alma cumo sálen las farrapicas de niebe de l cielo. Las necidades i las agruras son lhastras pa ls aliçaces de cuntinar a bencir. Ye buono ber que nun se lhamúrian nien guárdan sapeiras.
Que bun eisemplo you saco de pessoas assi! Nun ye l squecimiento, la solidon, las nuites fries i ls dies de nebones que ls fázen zistir de cuntinar a bibir. Nun píden nada, acértan l sou modo de bida al andar de l tiempo que fai, sien s’anrezinar, que manhana ye outro die, cumo l reloijo acerta nas bint’ i quatro horas. Son rejistentes que déixan un teçtemunho a to l mundo, que you gusto de registrar.