Lhabar roupa ne l riu

Esto de lhabar roupa a la mano
Fui jeito que me quedou
Pus durante muitos anhos
La roupa al riu me lhebou

Anxabonar na piedra de l riu
I poner al sol a quelorar
Depuis na auga corriente
Cun alegrie anxalagar

Cantar para spairecer
Las maugas de l coraçon
Yá que estas nun branqueában
Dado la sue scuridon

Se, se pudíssen lhabar
I mandá -las riu abaixo
Cuncerteza que las pessonas
Nun andában tan ambaixo

Mas pa las maugas de l coraçon
Que tanto mos marterízan
Nun hai auga i nin xabon
Que la sue delor suabizen

Depuis comer la merenda
Anquanto la roupa a quelorar
I se inda houbir tiempo
Ua soneca pegar

Mas cumo l tiempo ye scasso
Ye perciso spubitar
Porque la máquina son ls braços
I estes nun puoden molhengar

Ye perciso fuorça de punho
Para la roupa trocer bien
I quando son lhençoles ó cobertores
Pide-se ajuda a alguien

De buolta al doce lhar
I cun la trouxa a la cabeça
Nun hai rius nin barreiras
Que de caminar mos ampida

Ne ls dies frius, Miu Dius
You nun quiero nin pensar
Nas delores de unhas i nas lhágrimas
Que l friu fazie botar

L passado yá passou
L persente passa a correr
Por esso nun bal la pena, i …
L melhor ye squecer

Por esso pa zanubiar l sprito
Lhabo la roupa a la mano i refilo
Mas sei que ne l final
Queda todo bien cumigo

Por bezes tamien gusto
De ir sgrabatar na tierra
Para acalmar l sprito
Quando este stá an guerra

A la tierra you bou buscar
Einergie positiba
Dende depuis you quedar
Cun maior adrenalina

ArutnevA