20/01/09

Dá-le de trás



[Esta crónica saliu na 2ª sumana de janeiro ne l jornal A Voz do Nordeste.]


L calendairo marcou, hai poucos dies, l ampeço dun nuobo anho. Assi i todo, l tiempo nun zlenta, nien se deten para ampeçar ou para renacer cumo nuoba polha dua arble. L sfergante a que la bida se mos agarra ye la máquina na delantreira de l camboio de l tiempo, arrastrando bagones de melheiros, seclos, anhos, dies i outros sfergantes sien fin: botou-se a gaçpiar nun sabemos quando i nun hai modo de l detener. Querer antender l hoije sien l onte, ye tiempo perdido, cumo l duonho de l burro stranhar que l animal nun tenga fuorça para lhebar la carga se acabou de le dar bun quemido. Bien diç l dito dezideiro, dá-le de trás, quier dezir, dá-le bien a comer al burro tiempos antes de l aponer al trabalho, pus solo assi poderá ganhar fuorças para hoije. L mesmo se passa cul tiempo: l persente nunca poderá ser antendido a nun ser pula mano de l passado, mesmo quando yá stá squecido por todo mundo ou quando naide le dou amportança.

La guerra cuntina cun sou sangre a arrepinchar cada telejornal, i quieren que mos póngamos dun lhado ou doutro de la guerra sien tener na cuonta cumo se chegou até eilha. Puode un quedar quieto al ber la sue cidade ou aldé a ser arrasada por bombas radicales? Claro que nó. I se l que fur atacado atacar por sue beç todo un pobo, este há de quedar de manos ne ls bolsos? Naide puode pedir ua cousa dessas: bonda que cada un de nós se ponga nua dessas posiçones i poderá antendé-las melhor. Stado de Eisrael i Hamas, nun mos oubríguen a scolher, porque tenemos l dreito de mirar al para trás i ber cumo se chegou a este curral sien salida, de pobos que naide quier, que naide quijo, an que fame i malinas se le apegórun cumo costra a ua ferida. Para antender ye perciso que mos cúnten la cuonta zde hai muitos anhos até agora, sabendo que la culpa nun puode ser de pessonas que solo quieren salir de adonde fúrun ancurraladas, que quieren ber l hourizonte de la bida de ls filhos sien star burmeilho de sangre, negro de fame, roixo de delor, branco de feturo.

Todo mundo puso an 2009 un carimbo de crise, mas esta solo se antende se mirarmos al para trás, al modo cumo muita giente se cumporta sien moral, solo lhebada pula ganáncia sien regras i a la custa de todo mundo. Hai que le dar de trás a la crise i nun mos deixarmos lhebar por splicaçones i seluçones que squécen todo l que se passou.

La lhéngua mirandesa bai a fazer 10 anhos que fui recoincida cumo lhéngua de Pertual. Hoije bibe, cuntina a bibir, ua situacion defícele, que nun s’antende se nun mirarmos al que se passou an tiempos mais atrasados, mas que muitos, i quien manda, squece para nun tener que tomar medidas de fondo an sue ajuda: la própia eisistença de la lhéngua i l sou ser solo s’anténden de trás, pula sue stória: serie un crime que aceitáramos zbaratar l tiempo que mos fizo i dou l ser.

Un bun anho para todo mundo, nunca squecendo que solo l tiempo splica para ajudar a resolber, a todo hai que le dar de trás, i nunca ye tarde para esso.

amadeujf@gmail.com

2 comentários:

Fir disse...

Buonas tardes, Amadeu.
Gustei mui de ler este testo.
Relembra-mos la amportáncia de las mimórias, nua época tan propícia a squecimentos i amnésias coletibas.
Mirar para l passado ye amportante para saber quien somos i para traçar l feturo.
Un abraço.

Amadeu disse...

Buonas nuites, Fir,

Ye berdade todo l que dizes, mas mais inda: l passado tamien mos ajuda a antender l persente i a decidir qual ye l lhado cierto de las cousas.
Un abraço,
Amadeu