26/01/09
Manuel José Geraldes - Palaçuolo - 26-01-1972
La spera
Un carreiron calhado
na tierra caliente que abrasaba.
Bate l sol no çcampado
loinge de l Praino i de la segada.
Yerba alta, monte berde: touça braba.
Nun sfergante stoura ua granada!
I sal un tiro i ua bala i outra bala de rajada an redundel.
Ua checotada, un poulo, un ai i un sangrar.
Nos uolhos passa l branco de la niebe i de la gelada,
Bola l friu de l Praino al Ultramar
adonde quedeste, Manuel,
i para nada!
Abelhón, 26-01-2009
Subscrever:
Enviar feedback (Atom)
6 comentários:
Guapo poema Abelhon, brabo!
Quedo tamien cuntento puls que poemas que mos has de dar a seguir, puis naide scribe i publica un purmeiro poema ampunemente.
Un abraço,
Amadeu
Buonas tardes Abelhon,
Mas que guapo poema este. Gustei muito, parabienes i cuntina siempre.
Un abraço arrochado,
Francisco Domingues
Nunca será demais screbir subre la nuossa stória, mesmo que isso seia doloroso. Mas ye nuossa, e bós Abelhon botais-le la quentura ou la gilada que merece. Mui guapo l que dezeis, i cumo l dezeis. Que se calhen aquels que dizen que la çculanizaçon nun fui buona. Ye purque nun oubiran Manuel
Un abraço
Válter Deusdado
Biba, buonas nuites, Abelhon!
Ah, rapazes! I dezir que teniemos la quadrilha "ampestada" de poetas i un sien saber de nada!
Boleste alto cun este testo... i daste-mos buona ferronada - ó checotada cume dizes!
Un abraço!
Mui guapo
-Parabienes, yá l li bárias bezes, nun sei porquei mas cada beç que l leio queda mais grande grande.
-Nun quedaba da bien cumigo se eiqui nun benisse a dezir-te esto
Un abraço
Buonos dies
Hai cousas que nien you cumprendo al ajuntar las palabras que nun piden licéncia para ser usadas ... sfregantes de rábia, talbeç.
Ua patada de miel a todo mundo.
Enviar um comentário