Al serano d’Eimbierno.

Ua de las cousas que a mi siempre me gustou fúrun ls seranos pul Eimbierno. Nun hai ne l anho todo un tiempo tan guapo cumo l tiempo que fai ne l Eimbierno. Las cousas neste tiempo demúdan tantas bezes que ua pessona ten mesmo que quedar encantada cun todo. Ye l friu, la chuiba, l carambelo, l çanceinho, la nebrina, la niebe, las geladas, las anchenas, las lhagonas, ls rius i rigueiros que lhebando mais auga tóman outra bida. I ye nesse tiempo que se puode fazer las balientes fogueiras de cepos.
Quando quedamos alredror de la fogueira, cun todo aquel chiçpar de las brasas, las chamarielhas, las cuontas, l cumbíbio de to la família, fai cun que esse tiempo seia tan çfrente que queda na memória para siempre. An special ls seranos que se fazírun aquando de pequeinha.
L miu gusto pul Eimbierno nun ben solo de ls seranos i de l calor de la fogueira, mas tamien porque se nun fusse l Eimbierno nun podie ber las demudas de ls dies, las manhanas nebrinadas carregadas de çanceinho, ls campos todos ancubiertos de niebe, las lhagonas cun carambelo, sentir l friu de las geladas.
Mas por bien malos que fúran ls dies, al serano squecie-se todo, la calor de la fogueira ye cumo un milagro para todo. Ademais se la cumbersa arresbalar pa las cuontas i lhonas... Este gustar ben-me zde quando you era pequeinha, por bias de las cuontas que mie abó cuntaba, relhembro-las i cuido solo s’anténden porque éran cuntadas cun l tiempo que fai ne l Eimbierno, als seranes i an pie de la fogueira. Cuido que nun tenien tanto sabor cuntadas noutro tiempo que nun fura este.