[lupinus luteus]
Nun tengo bien la certeza se l nome an mirandés ye este, cuido que era assi que le chamábamos.
Tamien nun fui capaç de quedar culs retratos até tener un culas bainas secas, i apuis poné-los todos dua beç. Porque ye solo l que falta, ampeça berde cumo las demais, al percípio ua frol bien ambergonhada para apuis ser pimpona de sobra, dun amarielho adominador que se çtaca adonde bibe, las sues bainas quando se sécan quédan cun un ferron na punta. Çpedindo-se até soutranho.
8 comentários:
Buonos dies
Se ye l que questumaba creçer nas adiladas e an dalguns panes pouco aricados, deben de ser Pata Lhobos. Só nun m'acordo se la frol de l patalhobos ye amarielha u roixa.
Abraços
A mi da-me artes qu'isso se puôda usar nua buôna sopa cun cachiques de persunto !
Á Tiégui, isto nun son habas.
You digo habas i nó fabas, que quando dançaba deziemos:
Habas berdes, habas berdes
Bien las beio berdegar...
Ne l palácio de miu pai
Quien me dera alhá star!...
Bá,nun t'anraibes que you sei bien que sabies. You tamien gusto muito de habas cun presunto. :)
Á Foustino, soutro die nun te dixe, mas siempre me recíben bien an Zenízio.
Yá mie mai quando iba a bender pan a cabalho nua mula, an 1940 i antes, tenie alhá giente amiga.
Quanto al arrebenton, ye esse l nome, mas Amadeu dou bien la splicaçon.
L que faç mal, ye l arrebenta buis.
Abraços
Buonas nuites
Ten rezon Boieiro, las yebas de l retrato de Faustino son patalhobos ou antramocilha braba ou antramoços brabos [an pertués tremocilha], cul nome científico de "Lupinus Luteus".
Quando se agarra un campo cheno dessas froles ye mesmo guapo.
Buonos dies!
Inda a perpósito de habas u favas, yê probable que puoda acurrir algua zgrácia por falta d'anformación: hay personas a quien le falta ua enzima que entra ne decomposiçón e assimilaçón de las fabas por l'ourganismo. nesse causo la faba nun yê un bien mas un beneno que puode lhebar a la murte por causas que mata los glóbulos brumeilhos de l sangre.
cume eisemplo, dous sobrinos mius stubiran a la muorte quando éran garoticos por bias de haber quemido puré de fabas i las ourigenes d'eilhes són mirandesas de los dous lhados.
Tamiem yê coincido por favismo.
Abraços
Buonas tardes,
Mira, essa que Boieiro mos cunta subre las fabas nun la sabie, nien manginaba que ouibira ua cousa dessas.
Abraço,
You tamien nunca habie oubido falar nessa malina que ye l « fabismo » i que atinge quaije eissencialmente ls homes, parece.
Que pena ! Son ton buonas las fabas cumo daqui a uns dies (Nun bai a tardar muito) : Refogadas ou na sopa cun cebolha i alho nuobos de la Primabera i uas rodaixas de chouriça, chouriço i/ou presunto. Receita probablemente antre las mais típicas de la gastronomie mirandesa. Anganho-me ?
Haha ! De to'las maneiras l que beio yê qu'isso yê ua cousa berde... i se nun se fuma anton comes, nua sopa o nal que seia :-)
Enviar um comentário