17/04/08

Luzerna









[ Medicago sativa L.]

Cháman porqui ls tratadores de ls huortos a esta yerba Luzerna. Asparcida al trebo. Mas para onde la mie admiraçon s'iba era pa la forma de las froles: redondas salidas de fróncia, cumo l "pompom" dun gorro. You tube mais q'un quando era pequeinho até yá de crecido, feito de lhana i tenie dous agarrados a filos para atar subre la queixada i un terceiro na crona de la cabeça (serie porque you yá era boubielho). Nun habie gelada que ponisse las oureilha burmeilhas, i digo-bos l you, que an Zenízio quando benien si éran lindas i bien anfarinadas. Cuido que desses gorros todos ls de l mui tiempo se lhembraran, porque la friura quando benie era cumo l sol, benie para todos. Tamien se ponien nas alforjas uas bolras bien asparcidas.


7 comentários:

Tiégui disse...

Ah ! I isso chama-se Luzernas ! You l miu primo Carlos quemimos disso... ou melhor chupabamos d'isso ten un gustico açucrado.

An França tamien las quemie mas nun tenien l mesmo gusto. Anté un die qu'un s'admirou todo de me ber chupar cada cousica dessa frole...

-I tu comes d'isso ?
-Nun bes que cagan ende perro i gato i l que seia...

Caralho ! Nunca mas turnei a quemer d'isso !

Ana disse...

Mas naide se morriu! You tamien cumo muitas garoticas nestas tierras de França, gostábamos dessa brincadeira: arrancábamos alguas pétalas dessas froles i chupábamos la parte que staba agarrada a la planta. Las pinguitas açucradas que cunseguiemos absorber éran cumo pequeinhos rebuçados (quaije microscópicos!)ou tamien cumo refrescos naturales (a doses houmeopáticas!) oufrecidos pula Mai-Natureza.
I depuis hai que dezir que nó ?
L resto de la planta ye mui rica an proteínas i sirbe tamien depuis de desidratada (la mais de las bezes an fornos) cumo alimento para ls ganados i tamien ls coneilhos.
Dá-bos la risa ?
Quedai tamien a saber anton que ye ua de las plantas anti-OGM possibles cumo ye tamien l caso de l colza.
Puoden guardar todo l soja-OGM que cultíban, ls Brasileiros i ls Amaricanos, na Ouropa tamien nós tenemos ouro berde cumo ye l caso dessa planta.
Inda han de serbir las tierras i terricas dessas tierras de Miranda. Digo-bos-lo you!

Ana disse...

La soja.

AF disse...

An pertués recibe l nome de Aflafa ou Luzerna. An mirandés cuido que la cunfundimos cun ua de las bariadades de trebo, que nun ye, mas cuido que ye tamien assi chamada.
Ye antressante ber que las pessonas le chámen Luzerna i nó Lhuzerna, talbeç por la palabra benir de fuora.

Ana disse...

Tiégui ten rezon de lhembrar que siempre ye melhor ser prudente.
Ye berdade que l’alfafa ou luzerna ye ua planta comestible i nó solo para l ganado i ls coneilhos. Puls bistos tamien se poderie comer an salada ou na sopa mas cumo para todo hai que tomar alguas precauçones: labar todo bien labado i até fazer ferber subretodo se houbir ne l mesmo sítio onde fúrun apanhadas essas plantas animales cumo tal ratos ou outros robedores, raposas i até gatos i perros que stubírun an cuntato cun outros animales selbaiges capazes de transmitir ciertas malinas i outros bírus que puoden ser grabes i até mortales.
Mas cumo sáben, als garoticos todo se le antolhe; ye l caso dessas froles quelor de rosa claro que fázen pensar, ye bien berdade, ne ls pompones de ls gorricos i que inda porriba ténen un gusto açucrado. You mais dua beç quando era garota chupei frolicas de luzernas i nada de malo me acunteciu. Solo guardo guapas recordaçones.

Ana disse...

Parabienes al retratista, Amigo Faustino. Ls cinco retratos que aceitou de mos amostrar son todos mui pertinentes i de mui buona qualidade.
Este yerbanairo stá a quedar cada beç mais cumpleto i antressante.

Tiégui disse...

Haha ! Mas you nun dixe qu'habie que tener cuidado... quien fui, fui al que lo dixo a mi... de nun quemer isso que staba cheno de m...

héhéhé

You tamien pensei nal purquei qu'isso nun se chama Lhuzerna. Mas ya que bos nun dezies "lheite" mas "leite" pensei que tamien éra eigual ende, i nun disse nada.

Pude que seia Lhuzerna que dizen ende a riba nun sei.