04/04/08

La mala auga que mana

*



Hoije, bien a la purmanhana, quando agarrei un jornal para ler que queda siempre nua gabeta própia par’el ne la staçon de l Camboio adonde moro. Ua ambora que alhá benie fui la repunsable pul que bou a dezir. Las mies mimórias spertórun mais ua beç i apuis quedórun nun pulberino anfernal, mesmo que todo esto por bias duas i doutras benga muitas bezes a la cumbersa.

La nuoba dezie que todos ls nacientes d’auga de Sintra tenien auga mala pa las pessonas. I que ls antendidos nestas cousas de la salude de las pessonas, acunselhában a poner abisos ne las fuontes i funtanairos por bias de las dúbedas.

Para mal de ls nuossos pecados, este cunseilho dado puls antendidos a Sintra puode ser lhebado an cuonta an muitos i muitos lhugares deste planeta tierra.

Adonde antrórun las mies lhembráncias?

Antrórun porque quando you naci, hai pouco mais de cinquenta anhos, estes abisos habien de ser un fartote de risa. I naci ne l praino Mirandés, mas astribo-me a dezir que se habisse nacido an Sintra la cousa era la mesma. Hoije las çfréncias puoden ser alguas, mas nada de quedar a drumir neilhas. Nun habie, meio seclo atrás, fuonte, rigueiro ou lhagona, poço, galaton ou chafariç adonde un nun se regalasse de meter ls beiços i dar bunchos balientes i ais de sastisfaçon de la buona auga que angulhie. L que sei, ne ls mais deilhes ende adonde fui bubedor de garoto inda l fago quando alhá bou an rondas pul termo.

Mas tamien eiqui ye buono nun çpreziar l cunseilho de l dito: se bires las barbas de l tou bezino a arder, pon las tues de molho, mesmo que Sintra nun seia bezina de Miranda. Porque l porblema ye de todos i naide puode sacudir l'auga de l capote, nien s'ambaiar por muito mais tiempo. La cuncéncia coletiba ten que manar.

Se queremos tener a la purmanhana un cantaro d'auga buona cumo tenemos hoije l jornal.

1 comentário:

Amadeu disse...

Tenes rezon, Foustino. Nesse tiempo buiemos de boca an qualquiera lhado: dezien que l mais peligroso nun era l'auga star mala, mas star mui fresca, que un podie agarrar ua premonia.
Tamien nesse tiempo inda nun s'ousában yerbicidas i ls adubos éran poucos, mas la berdade ye que l'auga andaba siempre mui puorca, subretodo nas fuontes adonde se acachapuçában ls cántaros, deixando n'auga toda la porcarie que iba agarrada al culo de l cántaro. Dízen ls antendidos que esso fui repunsable por ua grande malina de tife que se dou an to la tierra de Miranda, an bários anhos, an special ne ls anhos 30 de l seclo passado.
Dezie-se «auga corriente nun mata giente», mas hoije esso yá nun ye berdade, anfeliçmente.
Un abraço,
Amadeu