L cinema cun un cierto oulhar: Las linhas de Wellington

Se you tubisse ido até Miranda i Sendin, nestes dies, adonde ye que you l haberie bisto esse filme que streou an Outubre passado? Nien sequiera an Bergáncia pula cierta. An Outubre passado percisamente, soube que deixou de haber cinema na capital de l çtrito hai yá ua temporada. La pessona que me dou l’ambora dou-me tamien a antender que achaba que era mesmo ua pena. Ua situaçon probablemente  pouco normal até. Só se de repente deixasse tamien de haber filmes, nuobos filmes i buns filmes até l que ye loinge de ser l caso. Anton?

Só an Lisboa era possible ber esse filme puls bistos, talbeç nien sequiera ne l Porto, nesta altura de l anho an que ir al cinema puode ser ua maneira de aquecer tamien l'alma, mas Lisboa cumo bien sabemos queda a uns 500 kms de Miranda. Ye assi anton tan defícele tener acesso a la cultura nesse paíç ?

A mi apeteciu-me aporbeitar este tiempo de férias de Natal i de Anho Nuobo para ber specialmente dous filmes, un realizado i outro produzido por portugueses i que dambos a dous tubírun ua buona crítica estes últimos meses. Ora para mi, la soluçon mais fácele para ls ber por mais ancrible que puoda parecer fui... nun ir percisamente a Pertual! Deixar-me star (Tendo an cuonta l preço de la gazolina, até menos denheiro un chega a gastar!) para poder ber a solo 50 kms de  çtáncia de mie casa (Calhou assi mas até podie haber sido mais acerca) ls dous filmes que m’antressaba ber sien tener que me çlocar até la capital (Paris para mi queda tan loinge cumo ir até Sendin). Quiero you dezir, que mesmo na porbíncia, aqui ne l Sul de França, a 800 kms de Paris, tube finalmente la possebilidade de ber esses dous filmes que you nunca haberie bisto pula cierta caso tubisse ido até Pertual nestes dies mas nun tubisse decidido ir até Lisboa...

I cumo para mi, Pertual nun ye solo Lisboa...

Agora que cheguei a este punto, bou anton dezir de que filmes se trataba:

L purmeiro fui Tabu de Miguel Gomes, quaije todo a preto i branco. I porque nó ?

L segundo fui Las linhas de Wellington de la chilena Valéria Sarmiento an que aparécen afamados atores franceses i strangeiros (l mais amportante ye sien dúbeda l americano John Malkovich ne l papel de l general anglés que ajudou Pertual a bencer an 1810 las tropas napoleónicas comandadas anton pul marechal Massena) cumo tamien atores pertueses eicelentes, antre eilhes Carloto Cotta ne l papel de l tenente Pedro de Alencar que ye tamien un de ls atores percipales de l filme Tabu de Miguel Gomes.

Ne ls dous filmes, hai cenas de muorte i cenas d’amor...

Fui l filme de Valéria Sarmiento adonde hai tamien cumo era de sperar muitas cenas de guerra  aquel assi i todo que mais m’ampressionou. Yá habie muitas bezes oubido falar nas linhas de Torres i lido essas páginas de la stória que splíquan l que mais amportante se passou durante las ambasones napoleónicas. Mas l filme mostra i dá ua buona eideia tamien de l’amportáncia que essas fortificaçones representórun efetibamente na altura...

Depuis houbo un oulhar... un oulhar straordinairamente guapo i sereno. Parecido probablemente cul uolhar dun anjo. Ls uolhicos claros i amerosos dua freira. Para quien yá chegou a ber l filme, ls uolhos daqueilha freira que serbie cumo anfermeira i cuidou, antre outros feridos i aleijados, de l tenente Pedro de Alencar. ls uolhos deilha dezien-me qualquiera cousa mas solo ne l final de l filme quando fui possible ler la lista cumpleta de ls atores ye que soube:

Elsa Zylberstein, ua de las atrizes franceses atuales que ten un de ls mais guapos oulhares de l cinema ouropeu, talbeç até mundial. Só por esso tamien baliu la pena ir al cinema nesse die. Baliu por acaso la pena ber las Linhas de Wellington mesmo que tubisse sido para mi nó an Pertual cumo poderiemos todos desear, penso, mas finalmente an tierras de França. Estas tierras que tenien cumo amperador, hai 200 anhos, un cierto Napoleon Bonaparte.