Ua lhona

-Era ua beç, hai 2011 anhos datrás, trés Reis resolbírun seguir ua streilha mui alhumbrosa, montando trés majestosos camelos.

- Chegados a Belen, parórun a pie dua loija (stábulo) i spreitando alhá para andrento, Belchior, Gaspar i Baltasar bíran l nino (Jasus), cun Marie sue mai.

- D’azinolhos, rezóru i adorórun la sagrada família, apuis abrindo ls sous tesouros, antregórun-le sues oufiertas: l ouro, ancenso i mirra.

-Belchior (l branco) terá ouferecido ouro, Gaspar (l'amarielho) terá ouferecido ancenso i Baltazar (l negro) terá ouferecido mirra.

-Sendo por debina adberténcia perbenidos, an suonho, nun bolberen pul mesmo caminho nien íren  a la persença d’Heirodes, bolbírun por outros caminos a las sues tierras.

- Assi i todo, nada mais s’ancuntra screbido subre este assunto nas Scrituras, mas la stória nun acabou eiqui.

- Diç-se por ende, a la boca cerrada, que Gaspar se terá anganhado ne l caminho  i 2011 anhos passados, chegou a un paíç a pie de l mar.

-Probe, sfarrapado, sien cheta nien meta, Gaspar tenta agora reaber la fertuna de l passado.

-De las toneladas d'ouro de que terá oubido falar, solo resta ua pequeinha parte.

- Ancenso nien bé-lo, terá sido queimado para zampestar l paiç a pie de l mar a quando las besitas de ls famosos de l’Ouropa.

-Sobraba le la mirra, muita mirra.

Mirra la salude

Mirra l'eiducaçon

Mírran ls ampregos

mírran ls ourdenados

Mírran las pensones de reforma

Mirra la justícia

Mirra la sigurança de las pessonas i bienes

Mírran ls dreitos i la lhibardade.

 Pronto, mirra este pobo que bibe a pie de l mar, qu'heiroicamente para uns, boubamente para outros, ten l FADO por çtino.