LEITURA DE LS LUSÍADAS AN MIRANDÉS

 Retrato de Alcides Meirinhos i Dinis Meirinhos]

LEITURA DE LS LUSÍADAS AN MIRANDÉS – GUILHERME FRAGOSO PEREIRA (Retrato 033)

Guilherme Fragoso Pereira (2004), naciu an Bergáncia, adonde bibe cun sous pais, Ana Fragoso i Vitor Pereira.
Quando s’apersentou a ler, habie feito uito anhos l die atrás (3 de agosto), fui por esso l mais nobico de ls lheitores de Ls Lusíadas. La sue einiciaçon ne l mirandés dou se solo por bias de ir a ler Ls Lusíadas, cun l'ajuda de sue mai, mirandesa i falante de mirandés. I ides a ber quando publicarmos l sonido de cada pessona a ler, Guilherme yá ten ua pernúncia mirandesa mui buona i speramos que este seia l ampeço para ganhar nuobas cumpeténcias na nuossa lhéngua, puis ye un rapaç baliente, mui spierto i mui bun aluno. Porsores nun le ban a faltar subretodo sue mai i sous abós de San Martino, adonde bai quaije todas la fins de sumana i ende passa ua buona parte de las férias. Assi eilhes lo quérgan ajudar.
Guilherme ye un de ls mirandeses que s’apersentou a ler yá nacido ne l seclo XXI [cun Afonso Cameirão i Francisco Antão Pereira, yá eiqui publicados], apuis de la lhéngua ser oufecializada i ansinada. Muita sprança tenemos an ninos cumo el, sien miedo i que zde pequeinhos le dan la mano a la nuossa lhéngua. Bota palantre Guilherme, puis cuntigo i outras i outros ninos cumo tu, la nuossa lhéngua há de chegar al menos al seclo XXII i... até adonde bós quejirdes puis eilha ye buossa por dreito própio.
Apersentou se a ler acumpanhado de sue mai, Ana Fragoso que le dá todo l apoio. Liu las stáncias 64 a 66 de l Canto III.