Quadras

Cun estas quadras bos deixo,
Ambersadas cumo bedes.
L’Algarbe ten António Aleixo,
L Praino ten José Esteves.

El sabe mesmo ambersar,
I fai-lo muita beç.
L’outro na outra lhéngua,
I Jesé an mirandés.

Tubo este blog l cundon,
De a todos mos ajuntar.
Creça, creça l munton,
I todos bamos a ganhar.

Cumo na procisson
Cada un ne l sou lhugar.
Uns para fazer munton
I outros para l’andor lhebar.

L balor de cada un,
Ye siempre relatibo.
Sien giente nun hai fiesta,
Sien Santo nun hai motibo.