Nace poesie

Se la mie alma chora i lhágrimas solta
L coraçon se aperta i l delor l sufuoca
Se qualquier cousa me abala i me perdo na rota
Me anregelo ne l Berano i na nuite frie
An marmúrios ó gritos
Nace poesie

Se la mulhier ye houmildada quando passo na rue
I l nino ye biolado i amplora ajuda
L delor corta-me l peito dessa augarielha cruda
Lhebanto-me cun fuorça pego la fuolha bazie
Lhanço-me an rebuolta
Nace poesie

Se por ser mal amada ua pessona sufre
You passo para mi to l sufrimento
Lhebanto la mie boç i cul sou lhamento
La mie alma fala l que eilha sintie
An deloridas palabras
Nace poesie

Se de l peito trasbordo la felcidade
Por te ber á boton a abrir an flor
Se la alegrie eisiste i subirte l amor
I to l ouniberso bibe an harmonie
Canto, feliç agradeço
Nace poesie

Se la prainura me ancanta mesclada de flores
Malmequeres papoulas urzes bioletas
Ls páixaros bólan an anleados amores
I la arble sbolácia cula airaçada frie
Persigo barboletas
Nace poesie

Se l sol me calece i la lhuna me anspira
An nuite strelhada i nun die qualquier
Se beio nun home alma de mulhier
Que a sufrir chora i anfin suspira
Me cumprende i me cuntagia
You canto cun ls dedos
Nace poesie...