Era pouca la tierra...

…era pouca la tierra para tanta giente!…

Quedei a matutar naquilho
que me dixo dua forma tan serena
i cun tanta sabedorie.

Por esso las pessonas se fazírun lhuitadoras,
nada ye por acauso, cuntinaba l nino…

Ten muita tierra agora,
mas ye siempre l mesmo nino
cumo se nun tubisse tierra nanhue.

Sigue sin parar,
perseguindo ls sous suonhos,
caminante agarrado a un palo
para se stribar,
deixando transparecer ua inocéncia cándida
de l nino que siempre fui.

I assi sigue lhuitando...

Tal cumo formiga
a cargar quemido pa l formigueiro,
sigue l nino, sin çcansar,
cumo se stubisse a lhuitar
por un cachico de tierra
para que l pan chegasse
para l'anho anteiro,
para la fame matar.

I assi...
bai seguindo ls suonhos...

… ye zmasiada la tierra, agora!...

Cumo,
se la tierra nun medra!!!???

Sumiu-se la giente,
hai sachos a mais,
hai puiales a mais,
hai tierras de sobra
malicas de solidon….

Zeia tirar-le l sufrir
oube-le ls lamentos,
bózios de solidon
que más nun son
que ls lamentos i bózios xordos
que de l sou peito salen,
quando ten que se ir…

Un die
mataran la solidon ls dous,
la tierra i el i,
aquel nino
tornará a jogar cula atiradeira
por aqueilhes campos i fraguedos,
perseguindo l sou suonho,
coraçon renacido,
tierra outra beç cun duonho!...