Amborrachai-bos

Hai que andar siempre borracho. Ye l que cunta. Ye solo isso que amporta. Para nun sentir l tremendo peso de l Tiempo que bos derreia las cuostas para la tierra, teneis que bos amborrachar sien parar. Mas cun quei? Cun bino, cun poesie ou cun birtude, cumo quejirdes. Mas amborrachai-bos. I se algua beç, nas scaleiras de un palácio, na yerba berde de un balado, na solidon fosca de l buosso quarto, spertardes, i la borracheira yá bos tubir apartado, procurai-le al biento, a la óndia, a la streilha, al páixaro, al reloijo, a todo l que se scapa, a todo l que geme, a todo l que ruodra, a todo l que canta, a todo l que fala, procurai-le que horas son; i l biento, la óndia, la streilha, l páixaro, l reloijo respunderan-bos: son horas de un se amborrachar. Para nun ser ls scrabos marterizados de l Tiempo, amborrachai-bos! Hai que andar siempre borracho! Cun bino, cun poesie ou cun birtude, cumo quejirdes.

C. Baudelaire

Le Spleen de Paris