La bida ten tantos carreirones
Cun tantos, tantos remissacos
Adonde damos tantos tropeçones
Ne l meio de daqueilhes buracos
Puls caminos que querie passar
Nun me deixórun seguir
Oubrigórun-me a zistir
I la biaige tube que terminar
Quando bolbi a spertar
Ne l meio de las cunfusones
Cun delores i anjaçones
Quaije na hora derradeira
Dixe assi desta maneira
La bida ten tantos carreirones
Carreirones que you pensaba
Que you ls podie passar
Mas lhougo l senhor azar
Me dixo que la biaije terminaba
La biaije assi se m'acababa
Strampalhórun-se ls farrapos
Quedei feito an cacos
Sien saber para adonde ir
La bida nun me deixou seguir
Cun tantos, tantos remissacos
Remissacos que iba a passar
Se me ténen deixado
Aquel momento cumplicado
Nun me deixou nin pensar
Tube que todo deixar
Ne l meio daqueilhes sticones
Birórun solo eilusones
Partírun-se todos ls cacos
Ancuntramos siempre buracos
Adonde damos tantos tropeçones
Als poucos fui melhorando
Bi ua lhuç, i m'agarrei
Nun me lhembro l que pensei
I puli you fui quedando
Tantos trabalhos passando
Ajuntando aqueilhes cacos
Tamien ls mius farrapos
Cousas que ten la bida
La mie quedou perdida
Ne l meio daqueilhes buracos
José António Esteves
1 comentário:
Amigo Jesé Antonho,
Teneis rezon, muito remissaco ten la bida, dá buolta que un nien sabes cumo aguanta.
Mas hai que ir palantre. Baliente ye quien nunca ziste al meio la caminada, mas sabeis melhor que naide cumo ye custoso.
Bien háiades pul eisemplo que mos dais.
Un abraço arrochado,
Amadeu
Enviar um comentário