Que sabes tu?

Que sabes tu de la miséria,

se bibes alienado?

Passas,

de coraçon angurbatado,

dás cuntapies al papelon

que me sirbe de colchon,

i cuntinas apressiado.

Que sabes tu de la fame,

de la fame i rábia que sinto,

se bibes ampanturrado?

Rábia de las antençones,

fame d'ouportunidade,

de justícia,

rábia de la podridon,

de la maldade,

de ls ampresários

i de l capitalismo zregulado

que quieren,

mano d'obra barata, a teston

i bán.

Que sabes tu de mi,

deste andraijo que tu bés?

Pensas tu que you era assi

i sou preguiçoso talbeç?

Roubórun-me todo:

L trabalho, la casa,

l miu mundo,

la denidade,

l'auga para me lhabar;

i l'eidade

ye pouca ó muita,

cunsante l antressar.

Que sabes tu de mi,

deste monte de benairos,

nas arcadas de la tua rue?

You que era bien bibido,

bien falante,

bien prouisto i bien bestido,

agora sou,
sien abrigo.

Que sabes tu?

Nien you sabie!...

Un die!...