Para mi nada de nuobo

Bíben-se tiempos çfíceles para un quedar assossegado, pius até l mais quemun de ls mortales ye martelhado to ls minutos, horas i dies afilo cun amboras qual deilhas la mais arrepelante.

Da ganas de dezir que nun mos quieren deixar a drumir na torna, dun modo ó doutro las malas amboras (notícias), bénen bien al de riba cumo ben l antulho na crona de las cachoneiras nas anchenas apuis dua baliente troniada. Chego a pensar que esta tortura de l’anformaçon telbisiba, de la rádio, ne ls jornales i rebistas ténen outros oujetibos mais perfundos, puis hoije yá se fai negócio de todo, cula salude de las pessonas anton ye l’arble de las patacas, l pobo que s’aporcate quanto mais debrebe melhor, porque se nun stá malo queda dun die pa l outro quier querga quier nó.
Mas para mi nada de nuobo, ou nun fusse you un rezonable aluno quando andube na scuola purmaria, daprendi i dende me quedou un bun manhuço de buns questumes, que l’eicelente, amiga i buona porsora me deixou.
Fui aluno de la senhora porsora Regina de l’aldé d’Angueira (ua de las filhas de l tiu capador) era la porsora de ls rapazes, porque la de las rapazas tamien era d’Angueira yá nun era bien assi, mas esso son cuontas doutro rosairo.
Ansinaba bien a screbir, ler i a studar todo l que benie ne ls lhibros, eisegente ne ls buns questumes i modos, nun deixaba de fazer la rebista a saber se habiemos lhabado las manos i unhas (tamien las oureilhas) i nun l fazie pur ditadura ou represson mas si porque la cuncéncia d’eiducadora ne l sentido geral staba persente. Sabie que era amportante cultubar an nós pequeinhos un modo de sermos lhimpos, i l cierto ye que quando la semiente ye buona nien toda se perde, son muitos ls eisemplos i somos muitos a recordar ls buns ansinamientos de las porsoras i porsores que tubimos na purmaria.
Ye berdade que eilha nun mos las lhababa, tamien eiqui nun se puode deixar de fuora la mai ou armana mais bielha que teniemos, pul que me toca fui assi, tamien siempre fui regla de casa nun salir sien mos lhabar.
Hoije quando oubo dezir que ua de la reglas mais eilementares para la populaçon se perbenir de la gripe ye la lhabaige de las manos, quedo surpreso porque esso soube-lo you siempre, que la lhimpeza ye eicencial, fiç-lo i fago-lo solo dou seguimiento a todo un ansino que me bieno de raiç, an casa yá mie mais tenie essa cunsumiçon culs filhos, la mie porsora, quando daprendi a dar las purmeiras ajudas (socorros), quando fiç família, pula mie bida afuora.
Boto las manos a la cabeça, cumo ancrédulo quedarie Santo Agostinho (se bolbisse a la tierra) quando beio que ua cousa cumo lhabar las manos inda tenga que ser publicitada, recomendada, ampuosta i seia perciso meter-la a fuorça ne ls questumes dun pobo.

Nesto nun pongo las dúbedas cumo ponie l cura António Vieira, ne l sermon als peixes, eiqui la culpa ye mesmo de l pobo, que nun se deixa eiducar.