De açucena a rosa burmeilha

Era flor de çucena, branca i pura
Puolos amarielhos i lhebes
Néctar doce eimaculado
Adonde l abelhon sou amado
Tiraba l sou miel
I de tan apaixonado
Le daba beisos
I la fazie sentir
Ua princesa
Cun tal singelesa
Que se sentie cumo fura
L´única flor de ls deseios.
Un die oulhou pa l lhado
I l zabergonhado, l abelhon
Staba anrebulhado
Ne l puolo doutra flor.
La probre çucena
An zeiluzon i a tritar
Dou-le un ambarron
L boubo de la abelhon
I puso-la a marchar.
Guapa cumo era, la linda çucena
Ancuntrou nun die de Primabera
Un beisa flor
De tan quelorido que era
I de bolar tan lhebe
Abriu lhougo an flor
I apaixonou-se debrebe.
Fúrun beisos tantos,
Cun l bico cumprido
Que nien sabe quantos
Quedando l sou néctar
Lhougo cunsemido
Cumo cunsemida
Quando biu
l sou amor
Cun outras flores repartido.
Nó, assi nó,
Dixo la flor anraibada,
Bos ides a ber
L que ye capaç de fazer
Ua flor anganhada.
Anxertou-se de roseira
I na Primabera soalheira
Abriu ua rosa burmeilha
Que relhamposa i feiteceira
A naide se abrie i
Bibie solo para eillha;
Rie-se para todos,
l beisa flor, l moscardo, l abelhon,
Piçcaba-l l uolho
Amostraba paixon
Mas a ningun querie.
I assi, la flor çpeitada
Siempre perfumada
Ningun la tenie
i se la cheiraba,
era porque la respeitaba.
Ls stames solo amostraba,
A quien i quando eilha querie.