Quiero amostrá-te...

Tu que tenes augas de quelores de cielo, berdes, de azul cobalto ou ua mistura de azul celeste i andigo.
Tu que tenes barcos, gente a sonhar an cruzeiros, mulhieres que chóran ls filhos que an ti se afundírun anquanto acaçában peixes an redes de nuolos, tantos nuolos cumo ls que se tecírun nas sues bidas.
Tu que tenes charrascas, tu que tenes poder tamanho, tu que tenes serenas a anfeiteçar marineiros i ls angulhes apuis que perdidos, tu que tenes gaibotas an mastros a acenhar l cielo.
Tu que pensas que tenes todo...
Cumo tu te eiludes miu amigo!...
Deixa-me que te amostre amigo, ua tierra que nun te tenendo, sorbiu l tou azul atrabeç de l cielo i l tou berde atrabeç de ls montes i de las prainuras.
I amostro-te l cielo strelhado a la nuite, de l mais puro cobalto, cun la lhuna miruolha a begiar las custelhaçones i las streilhas, nun báian eilhas a anfunisgar-se por qualquiera galaton dun planeta perdido, deseoso de lhuç i las lhiebe.
Agora bás a calhá-te, acabar cun ls tous roncos, nun baias a assustar ls ranucalhos que cántan nas lhagonas i nos charcos quaije que secos. Oube, nun lhebantes óndias, queda-te an silenço, ua nuite que seia, la nuite de l tou assossego i oube tamien ls grilhos a cantar que sperórun zanquietos que las checharras se calhássen, para nun le stragar la sue melodie de ls dies calientes, cumpanhas de segadores que tamien cántan, anquanto de quadriles drobados púxan las fouces para cortar ls trigales cun sous marfolhos de torna cerrada.
Quiero amostrá-te las óndias, óndias pacíficas, adonde nun se afógan marineiros, óndias de beilado anriba de ls centenos, daqueilhas de las senaras de la mie nineç i que de tan berdes apuis se buolben ouro, se sécan, déixan de ondear i apuis mátan la fame a ninos.
Mira ls ninos que de tan pequerricos nun se béien antre ls chougarços quando bán a ser buieiros.
Quiero amostrá-te todo deste praino, aquel de que you te falo quando tengo saudades de la sue quietude, de las sues óndias i te besito para ber las tues i l tou praino berde que eimagino cumo sendo centeno.
Quiero amostrá-te...