Fui un die

Era Outonho, la tarde caíe subre un cielo amenaçando chuba. Gordas pingas de auga ampurradas pul biento, smagában-se na calçada produzindo un sonido rouco, uoco, baziu. Nun tardou que l passeio i la strada ganhássen aqueilha quelor parda, chorosa i triste. La tarde reboltara-se. Bestira aqueilha quelor pardacenta, sin se deixar quemober. La chuba ganhara agora aquel ritmo cuntino que deixaba anteber muitas horas eiguales. La gabardina siempre protegie algo, mas l Mundo zababa cuntinamente. La muorte prematura de la mai, tirara-le ls sentidos. José Albes, arrincado por fuorça de la guerra ne l Ultramar, deixara l´aldé i la família habie poucos meses, i purparaba-se cumo cientos de rapazes para çfender la Pátria, que era assi que le tenien ansinado. Tenie binte anhos, bien feitos, nun sendo de ls más fuortes, até un cachico fracote, mas de bun carátele.
Nada sabie de Lisboua, tan loinge, einorme, grande demás pa l sou gusto. Custou-le deixar l´aldé.
Ua tarde na tropa ye abisado para atender l telfone ne l gabinete de l pessonal de serbício na portarie. Era l sou nome i númaro que tenien sido oubidos. Sós tu, oube-se al lhado. Nun se oubie. José Albes a 400 Kms atender l telfone solo por anganho. Tembrou i quedou an suspenso. Solo puode ser anganho. De l outro lhado de la lhinha mal recoinciu Antonho, l armano más bielho que le dezie que la mai se morrira. L sol parou i a tierra balanciaba-se dun lhado pa l outro, cumo que a la borda dun percepício.
Ne l camboio, todo agora le parecie stranho. Las pessonas, muitas que anchien l bagon, tenien perdido l´alma, era ampossible que nun arreparássen ne l sou sufrimento i zbintura. Era ua tarde andefinida, sin sol, solo cun rugidos muito al loinge andecifrables. L camboio alhá sigue l sou camino, bai cuntrafeito, chia, bota subre ls passageiros la sue raiba, antes de parar na staçon. Queixa-se, sin se reboltar. Dende a pouco ganha outra beç l ritmo alquebrado. José stá mudo, nun fala. Nun ye perciso naide repara ne l sou sumbrante cundolido.
La redadeira beç que sultara ua palabra fura hai muitas horas al telfone cul armano. Sinte-se baziu, tal cumo l stómado que nun se lhembra de pedir nada. La tarde abança cul çponer. Spreita algue lhuç mui loinge sin saber porquei.
Ye meia nuite, l´aldé drume cun ua lhuç fraca de candieiros ralos pulas rues streitas. José anda la çtáncia que l separa de la sue casa. Meio sámbano, sin fuolego i mudo.
Talbeç nin fale, i se baia a deitar de tan cansado que stá. José sinte un baziu einorme, que a la medida que crece, l antristece. Staba eili, spierto, i agora sentie l apelo de l stómado para comer qualquira cousa. La lhuç de la manhana filtrada por aqueilhes montes i sierras, ampeçaba a ser-le familiar. Ls pequeinhos rugidos de l´aldé chegában-le agora debagar, acariciando-le l´alma.

Válter Deusdado