[Nota: por mi, muito gustarie de ber muita giente ne l die 27 a las 09, 30 a diçcutir subre la fala mirandesa i l que se há-de fazer para que cada beç se fale mais, seguindo l lema FALAR YE BIBIR. Amadeu Ferreira]
GEADA 2009
L friu retorna i cul chega tamien la segunda eidiçon de l berdadeiro festibal d'ambierno... L "GEADA 2009 - II Festibal de Cultura Tradecional de las Tierras de Miranda", ye yá ne ls próssimos dies 26, 27 i 28 de Dezembre, an Miranda de l Douro.
L GEADA 2009 ye ua einiciatiba de la Associaçon Recreatiba de la Mocidade Mirandesa - ARJM i de l Grupo de Pauliteiros de la Cidade de Miranda de l Douro.
Na sue 2ª eidiçon, l GEADA tenerá cumo oubjetibos percipales: festejar i dibulgar la cultura, la lhéngua i las tradiçones de ambierno de las Tierras de Miranda i comemorar ls "10 Anhos de Oufecializaçon de la Lhéngua Mirandesa".
Al lhargo de l festibal, ls partecipantes ban a tener la possiblidade de coincer alguas de las mais guapas tradiçones de ambierno de l Praino Mirandés.
Antre la prainada i las arribas de las Tierras de Miranda, qualquiera poderá beilar al redror de la tradecional fogueira de l galho i al sonido de las mais guapas gaitas de fuolhes, beilar pauliteiros i música tradecional mirandesa, tocar strumientos tradecionales, çcubrir la lhengua mirandesa, cumbibir nas típicas adegas de l centro stórico de Miranda de l Douro, passear por alguas de las mais guapas aldés de l praino pula Rota de l Cuntrabando, fazer i probar anchidos, i deliciar-se culs sabores de la gastronomie tradecional mirandesa.
L GEADA ambolbe música i quando se fala de música tradecional, l praino mirandés ten muito para amostrar, grupos cumo "Lenga Lenga", "Anda Camino", "Grupo de Pauliteiros de la Cidade de Miranda de l Douro", "Pauliteiricas de Miranda de l Douro", "Coro Anfantil de l ABE de Miranda de l Douro" i ls "Gaiteiricos de Miranda" prométen calcer la fiesta.
Benidos de l mundo ancantado de las gaitas, de ls bombos i de las tradiçones aterraran inda an Miranda de l Douro alguns de ls melhores grupos de música tradecional de l momiento, tal cumo, ls "Pé na Terra", "Tuttis Catraputtis", ls "Roncos do Diabo", l "Grupo de Caretos de Podence", ls minhotos "Ares da Raia" i l "Grupo de Bombos de São Sebastião de Darque" i ls galegos "Projecto Trepja", un eiletrizante porjeto de música tradecional eiletrónica.
L'ourganizaçon de l GEADA pretende tamien amostrar l que de melhor se faç por Tierras de Miranda, decorriran antoce, an paralelo al festibal la "I Mostra Associatiba de las Tierras de Miranda" i la "II Sposiçon Artística de la Mocidade Mirandesa - INOVART".
Tal cumo l lhema de l festibal andica - "BAMOS DERRETIR L CARAMBELO!" - la fiesta promete calcer i spalhar-se un pouco por to la cidade de Miranda de l Douro, bien cumo por alguas aldés de l praino.
De la nuossa parte pormetemos que cada partecipante, al lhargo destes trés dies de berdadeira fiesta, çfruitará neste houmilde canto de Pertual, de bibéncias einesquecibles, i tenrá la possiblidade única de bibir i coincer por drento las mais guapas tradiçones de l Praino Mirandés, cunfraternizando bien d'acerca culas gientes de las Tierras de Miranda."
Porgrama Cumpleto
Die 26
14h00 - Abertura de las anscriçones (Junto a la Fogueira de l Galho - Lhargo D.João III)
14h15 - Einouguraçon de a 2º INOBART- Sposiçon Artística de la Mocidade Mirandesa
14h15 - Arruada cun: Grupo de Caretos de Podence i Grupo de Bombos de São Sebastião de Darque
21h00 - Adegas-Papper00h00 - Gaitas i Chouriças a la suolta na Fogueira (Lhargo D.João III): Gaiteiricos de Miranda de l Douro, Ares da Raia , Anda Camino
Die 27
9h00 - Einouguraçon de la "Mostra Associatiba de las Tierras de Miranda"
9h30 - Cunferéncia: 10 anhos de Ouficializaçon de la Lhéngua Mirandesa - FALAR YE BIBIR
13h00 - Almuorço Tradecional
15h00 - Colóquio de Natal
17h00 - Atuaçon de l Grupo de Pauliteiricas de Miranda de l Douro
17h00 - Ouficina de Bailes i Strumientos Mirandeses
20h00 - Jantar Tradecional
22.00h -Baile Tradecional: Pauliteiros de la Cidade de Miranda de l Douro; Roncos do Diabo; Pé na Terra; Projecto Trepja.Die
28
09h30 - Passeio a pie: "Na rota de l cuntrabando"
13h00 - Almuorço Tradecional ne l San Juan de las Arribas
14h00 - Cumbíbio an Aldé Nuoba
17h00 - Ouficinas de Danças i Strumientos Galhegos
20h00 - Jantar Tradecional22h00- Baile Tradecional: Coro Anfantil de l ABE de Miranda de l Douro; Tuttis Catraputtis; Lenga Lenga Mais anformaçones:
festivalgeada@gmail.com; Fernando Silva - 915088034;
2 comentários:
Fisicamente não posso estar presente, mas acompanharei no blogue as ideias que sairam da vossa reunião.
Estou a começar a entender melhor o léxico, leio bem mas falar ainda não consegui. Mas hei-de lá chegar...
Feliz natal para todos
e que 2010 seja o concretizar dos vossos sonhos.
carmo
Amigos Fernando Silva e Amadeu,
Nun tengo l prazer de coincer a Fernando Silva, mas porque gustais de l mirandés, yá sei que sodes miu amigo.
Parabienes por esta einiciatiba de l Geada, que ten uns eicelentes oubjetibos de balorizaçon, dibulçon i comemoraçon de l 10º Anibersário de Oufecializaçon de la Lhéngua Mirandesa.
Para nós ls que nacemos an tierras de miranda, l Geada parece-me ser ua de las melhores maneiras d'honrar ls nuossos houmildes i çprezados antepassados que passoran la quaije totalidade de la bida nas aldés, que mos biran nacer, mos amamentórun, mos criórun, mos eiducórun i mos ajudórun a chegar até eiqui.
l Geada ten un eicelente porgrama pa la afirmaçon de la eidentidade mirandesa, i para mantenermos un de ls maiores patrimonhos de la nuossa bida, la lhéngua mirandesa, biba i bien biba.
Tengo muita pena de nun poder estar nesses dies an Miranda, porque ban ser mui anteressantes para nós ls mirandeses mos reancuontrarmos para zanferrujar i para rebibir la speriéncia lhenguística que mos atrabessou ls anhos de mocidade nas aldés mirandesas.
Mais ua beç, parabienes Fernando Silva i Amadeu, por este ancantador cachico de stória de la lhéngua i cultura mirandesas que stais a screbir na tierra que la biu nascir.
Amigos mirandeses, nun çqueçais l que ya screbi bárias beçes, scuitar Amadeu Ferreira ye scuitar la sabedorie de l mirandés i ls mais prefundos coincimentos de la stória i cultura mirandesas.
Un abraço mui arrochado de,
Leonardo Antão
Enviar um comentário