08/12/09

Ne próssimo die 10 de Dezembre (çpuis de manhana)






Ne l próssimo die 10 de l més de Dezembre, fai l sítio de l’Associaçon Cultural i Recreatiba Nial de la Boubielha dous (2) anhos, çque quedou çponible pa to l mundo, dezido doutro modo, que naciu ou cula lhenguaige d’agora anriba (on line).

La criaçon deste sítio naciu dua necidade que se benie sentindo hai muito tiempo andentro de la sue ourganizaçon para dibulgar las sues atebidades i chegar mais debrebe als associados, sous familiares i cunterráneos.

Zde hai mais de trés dezenas d’anhos que ls Zenizienses, sous familiares, amigos i cunterráneos bénen zambolbendo ua buona cemba d’atebidades culturales i recreatibas, seia na region de Lisboua i alredores adonde bibe ua grande maiorie, seia an parcerie cula Associaçon Cultural i Recreatiba Sol Nascente na tierra de sues ouriges.

Las gientes dacá i dalhá siempre tubírun cumo refréncia l’Associaçon por bias desta trabalhar para mantener la chama de las tradiçones i questumes, ajuntar las pessonas an cumbíbios, acarinar estes ajuntouros de cunfraternizaçon, acalmar las saudades i ber pessonas que por bias dua bida muito acupada que todos tenemos só eiqui i assi era possible.

L sítio fui assi mais ua jinela que s’abriu para melhor chegar a to las pessonas, dar a coincer las sues einiciatibas, pormober i dibulgar feitos i oupeniones. L zambolbimiento i ouportunidades benidas de las nuobas tecnologies nun podien ser ua ferramienta que l’Associaçon nun fazisse causo.

Tamien na berdade se diga, muitos associados i cunterránios stában fazendo cousas mui guapas, amportantes i de balor, ne l artesano, na pintura, na scrita de la lhéngua mirandesa i sien este “Sítio” nun salien a público, por outras palabras nun dibulgar serie un erro, l sítio fui i cuntina a ser la melhor forma de l fazer, l melhor meio de chegar a mais, mais debrebe i mais loinge.

Dous anhos de bida ye mui pouca eidade, mas puode tener sido muito se la sue mensaige fui antendida, se chegou a cunterráneos que stan noutras tierras d’adoçon, será muito mais se del se fazir uso, s’el fur bisto cumo ua atebidade de quemunicaçon i lhigaçon als sous repunsables i demais eilemientos.

Muita giente que stá spargida pul mundo, que quemunga de ls mesmos percípios associatibos i culturales, quier i merece saber destas cousas, chegou-le cuido que grácias al sítio, assi nós séiamos capazes de mantener esta lhigaçon.

Stan a miu ber de parabienes ls respunsables de l’Associaçon.

Ye siempre de lhoubar todo al que se fai para bien de las gientes, sues tradiçones i cultura.


Quien somos

http://nialdelaboubielha.org/index.php?option=com_content&view=article&id=44&Itemid=53





5 comentários:

Amadeu disse...

Caro amigo Faustino,

Muitos parabienes por todo l trabalho que teneis feito nesse sítio tan bibo i adonde la nuossa lhéngua i cultura son reinas.
Nestes dous anhos cuido que nun tenerá habido un die an que nun passei por alhá, siempre cun grande gusto, cumo quien todos ls dies bai a casa.
Cuntinai i que de hoije nun anho
Un abraço para todos,
Amadeu

leonardo antao disse...

Stimado Faustino:

Ye guapo ber la grandura de l trabalho destes dous anhos de bida de l site nialdelaboubielha, cun la dibersidade de testos suobre ls cumbíbios de la nuossa Associaçon Cultural i Recreatiba Nial de la Boubielha, de testos suobre las Palhestras de Amadeu Ferreira, mui anriquecedores de la stória de l mirandés, de guapos retraticos, de anformaçon mui prestimosa suobre la nuossa querida aldé de Zenízio, de eicelentes testos de bários scritores de Lhéngua mirandesa...

L site ye ua de las maiores obras de colaboraçon de bárias pessonas spalhadas por todo l mundo, pal zambuolbimiento i dibulgaçon de la cultura zeniziense i de la lhéngua mirandesa, que ajudou a oumentar i melhorar la lhigaçon antre ls que bibimos eiqui por por Lisboua i alredores i que ajudou a tornar mais fuorte la ounion antre ls zenizienses i ls mirandeses.

Cumo Persidente de la Direçon de la Associaçon Nial de la Boubielha, serie angrato se nó deixasse eiqui, an nome de todos ls associados, un perfundo agradecimiento a Faustino, , cumo administrador principal de l site nialdelaboubielha (an colaboraçon cun Valter) pul eicelente apoio prestado na ourganizaçon de ls trés eibentos anuales de la Associaçon i pula forma mui entusiasta i brilhante cumo cuntribui pa la cuncretizaçon de l grande oubjetibo de la Associaçon “de manter biba la lhéngua Mirandesa”.

Grácias al sou fuorte sprito associatibo, a la sue fruntalidade, hounestidade i rigor, al sou sprito dinámico i amprendedor, al straordinairo trabalho zambolbido Faustino cuntribuiu seneficatibamente pal prestígio i cumprimiento de a misson de la Associaçon i, por esso, ye credor de grande stima i cunsidraçon de todos ls associados i merecedor que ls serbícios por si prestados séian eiqui publicamente rialçados i cunsidrados de mui eilebado mérito.

De l fondo de l coraçon, un mui oubrigado a Faustino i a todos ls que participórun ne l site nialdelaboubielha.
Leonardo Antão

adeusdado disse...

Caro Faustino
Sabemos bien cumo ye amportante esta jinela pal Mundo. Tenemos que cuntinar este trabalho que tu tan bien tenes feito. Palantre rapaç, ye que ye camino.
Parabienes
Válter

franciscobelharino disse...

Buonas tardes Faustino,
Parabienes al Nial de la Boubielha por estes dous anhos de trabalho i an special al sócio Faustino, que fui l grande reponsáble de l site. Parabienes i cuntina siempre.

Un abraço,

Francisco steia siempre

Adelaide Monteiro disse...

Un nialico de boubielha a cheirar a flores silbestres.
Parabienes i buona cuntinaçon.

Beisicos

Adelaide