Guapo retrato de Boieiro, http://www.photoblog.com/Boieiro/2008/09/20/potes-i-posta.html , "Potes i posta", 20 de Setembre de 2008.
La puosta :
só ye buona an Sendin!,
stá siempre a dezir Juquin.
I an Bempuosta,
tamien ye buona la puosta…
Mas ten que star bien cumpuosta !
Quanto al bulho …
- Hai quien diga « botielho »,
sei porque yá sou bielho,
puis ye, miu filho ! -
… bonda solo un uolho,
quando aperta l bandulho,
para saber que l buono
ye l de Palaçuolo !
Dá cá un ambrulho
i ata agora l nuolo :
Chicha an çuça :
Amisade nuossa !
Anchido cun uossos :
Salude pa ls buossos !
P.S. Quien será l’alma generosa que se bai a alhembrar tamien de poner, neste blogue ou noutros, guapos retratos de bulhos i de puostas cumo fizo ne l sou fotoblogue l grande retratista Boieiro, ou crónicas "de ler i chorar por mais !" cumo la que fui eiditada recentemiente por Amadeu Ferreira ne l Sendin an Linha http://www.sendim.net/ subre essa specialidade bien mirandesa que ye l bulho ? Pregunto porque ne l paíç adonde moro (La França), bulhos nun hai i puostas… si, por acaso, porque se furmos a ber la puosta ye eissencialmente chicha assada na brasa, receita bielha cumo l mundo!… mas purparadas las "puostas", an França, cun chicha de outras raças do que la Mirandesa antre las quales la Charolaise (de la region de Lyon), la Blonde d’Aquitaine (Bordeus), l veau du Ségala (Aveyron), la Salers (Auvergne), etc., etc.
I que todos me perdónen, puis ye berdade que stamos an tiempos de crise. Tiempos de bacas magras…!
Mas outra cousa assi i todo: an França, parece que tamien hai ua raça «mirandaise» (ber: Wikipedia por eisemplo) de l nome dua localidade que se chama Mirande, ne l Sudoeste de la França, ne l departamiento de l Gers i que ye cunsidrada cumo "ua raça bobina francesa" (sic)… Mas nun digo mais porque nun sou specialista anque mius pais stéian a bibir tamien ne l Gers, na cidade de Auch que queda solo a uns 25 kms de Mirande... i you a uns 130...
3 comentários:
Buonas nuites
I la tabafeia está para salir ... de l lhume ... calentica.
Abraços
Buonos dies Ana,
Guapos bersos estes subre la puosta i ls botielhos. L retrato de Boieiro quaijeque faç auga na boca solo de oulhar pa la puosta, mas cumo dezie l outro melhor saberie.
Un abraço,
Francisco Domingues
Buonas nuites i bien haia a todos,
Nun cheguei a preguntar “previamente” a Alcides se me outorizaba a ilustrar este miu nuobo testo cun un retrato de la outorie del, spero que me perdone. Mas l retrato balie mesmo la pena. Esse i muitos outros. Todos !
Gusto quando ls testos ténen eilustraçones mas debo dezir que sou mui preguiçosa para tirar retratos… i acabo tamien por tener un sério atraso an relaçon a muitos para quien tirar retratos i poné-los nun ecran debe de ser ua cousa tan fácele cumo beber auga. Ye ua cousa que tamien tengo que daprender a fazer !
Mas quando soubir, prometo que tamien oufrecerei retratos mius… se chegar a la purfeiçon a que alguns yá chegórun… i antre eilhes, Mirandeses tamien cumo Alcides.
Ua buona cuntinaçon para bós dous i para todas las pessonas que tamien gústan de ler este blogue.
Enviar um comentário