Se calha alguas bezes you si l fui. Cuido que ser rico ou ser probe, nun era cierto que un nun fusse spiruolho. Ser spiruolho talbeç tenga mais a ber cula falta de nun tener las cousas que se béien quemer, a si a modo de lhambisquice, nun ye fame.
Cierto ye que stou a falar de l miu tiempo de garoto, ne ls anhos cinquenta/sessenta de l seclo atrasado, de bolhos para alhá de l pan pan lebe, ls sodos i ls roscos mais nun habie, de fruitos solo aqueilhes de la temporada, de arrebuçados un solo se lhambiscaba culs de las doceiras nas fiestas. Assi sendo, nun era de stranhar que qualquiera garoto quando bie quemer uas galhetas spanholas quedaba spiruolho.
Mas ser spiruolho ye un defeito de ls taludos. Se nun l fusse, nunca serie cousa de cunsumir tanto mie mai. Puis nunca se cansaba de mos dezir, quando éramos pequeinhos i ibamos a qualquiera lhado, a mi i mius armanos, Bós nun séiades spiruolhos! I mie mai nun era mulhier de malos cunseilhos, se l fazie alhá tenie las sue rezones.
Garotos que querien culs uolhos l que ls outros stában a quemer éran feios, ambergonhában la família, nun tenien eiducaçon. Mas serie assi mesmo!? Será que ne ls tiempos dantes, quando muitos garotos deseában l que ls outros quemien, la mais de la bezes nun serie la fame? Porque la fame eisistiu, las sobras nun podien ser muitas adonde ls crios éran quaije siempre mais que meia dúzia. La falta de quemer fui ua relidade, que las famílias todo fazien para scunder de ls parientes i bezinos. Quantas bezes a las tulhas se le bie l fondo antes de la segada, ls garbanços i las bainas s’acabában sien tener nada na huorta. Bergonha de nun tener que quemer, por bias de la probreza, uma maleita que inda nun se barriu de beç.
Inda benirá l die an que las mais recoméndan als filhos para nun spiruolhar?
Que sei you?
3 comentários:
Buonas tardes Faustino,
Ye bien berdade l que dizes subre ser spiruolho. Mas habie garotos que éran mais spiruolhos que outros i a las bezes anté tenien las cousas. Claro que quando se trataba de lhambiçquices que nun habie todos ls dies, todos tenien la sue parte de spiruolhos.
You inda me lhembro de spiruolhar las galhetas de Bernardo i de las armanas Marie i Maquelina que sue mai l trazie de Spanha. Mie mai a seguir ralhaba cumigo dezindo que staba a agagarra cousas de la mano de quien tenie menos que nós, mas l porblema ye que nas nuossas tuolhas nun habie galhetas nien outras lhambiçquices que eilhes a las bezes tenien.
Spero que l tiempo de ser spiruolho por nun tener las cousas nun se alhargue a mais naide i que esse tiempo passe debrebe pa ls que indan nun las ténen.
Un abraço,
Francisco Domingues
Buonas tardes tiu Faustino,
Parece-me a mi que serei mais nuobo do que bós, mas la liçon que mius pais me daban era la mesma.
Lhembro-me siempre de l que miu pai me dezie, a mi i a mie armana, quando por acaso (i eran ralas las bezes), teniemos assi algua alambuge, - nun baiades a quemer isso pa la rue, que se le sacan ls uolhos a ls outros garoticos!
Abraço
Félç
Buonas nuites, Faustino,
Cuncordo cuntigo, cuido que todo benie de la gana de las cousas que nun habie, ou que ralamente habie. I las pessonas tenien bergonha.
Nós an Sendin nun deziemos «spiruolho» i «spirolhar», deziemos mais «sopron» i «assopronar».
Un abraço,
Amadeu
Enviar um comentário