Yá muitos anhos atrás
Semiente mie bó sembrou
Germinou por ende
Qu'inda nun se secou
Semiente mie bó sembrou
Germinou por ende
Qu'inda nun se secou
Germinórun por Palaçuolo
Buns fruitos dórun puli
Fúrun acrescentando
I yá bamos eiqui
La última naciu esta nuite
Yá la stábamos a sperar
Nun sei adonde chegaran
Assi por este andar
Fázen parte de la mie stória
Ben de semientes que you sembrei
Fúrun semientes, que de miu pai
Un die you hardei
Botei-las lhougo a la tierra
A ber se si pegaba
Para ber se la mie stória
Inda nun se acababa
Pegórun a la purmeira
Pus nunca se secórun
I agora yá son eilhas
Que outras semientes dórun
Este que bieno esta nuite
Ye l fruito dua que you sembrei
Demorou a dar sou fruito
Mas inda bien que la plantei
Agora daqui palantre
Ye solo quedar a sperar
Que eilhes fágan sue sementeira
Para la mie stória nun s'acabar
You até sei mui bien
Qu'eilha ten que acabar
Mas yá quédan ls nietos
Para la stória cuntinar
José António Esteves
Bumioso
3 comentários:
Caro amigo Jesé Antonho,
Mas que cuntento you quedo de bos ber a partecipar neste nuosso blogue. Hai que tiempos bos speraba, mas nestas cousas nun hai que tener priessa. Para mi, i cuido que para toda la quadrilha, ye ua grande honra tener-bos acá a partecipar.
Cada beç mais, esta quadrilha nun hai quien la atalhe.
I anton cun esse retratico que poneis, nien sei que bos diga: falais an semiente i eilha si ye de purmeira classe. Muitos parabienes als pais i tamien als abós. I cumo se chama?
Anton cun este quantos nietos yá son?
Anton se este bos naciu esta nuite l més atrasado naciu-bos outro nieto, ou stou anganhado? Carai, assi nun sei adonde ides a parar.
Bá, bós ide-mos dando notícias i botai para acá ls buossos bersos i las buossas lhonas que andamos todos cun mais fame dessas cousas que you sei alhá.
Un abraço arrochado, de amisade i de parabienes.
Amadeu Ferreira
Buonas tardes este ye l juan yá l debeis cunhecer.Ls bersos ye que fúran feitos naquel die que naciu, mas solo agora antrórun eiqui. assi anté parece que ye outro,mas ye l miesmo, Pronto stá feito l anganho. Para saber yá son seis al todo, este ye l ultimo até ber.Até outra beç un abraço Esteves
Buonas tardes este ye l juan yá l debeis cunhecer.Ls bersos ye que fúran feitos naquel die que naciu, mas solo agora antrórun eiqui. assi anté parece que ye outro,mas ye l miesmo, Pronto stá feito l anganho. Para saber yá son seis al todo, este ye l ultimo até ber.Até outra beç un abraço Esteves
Enviar um comentário