You sou tetrapleijo
Nun l bou you a scunder
Digo als que nun me conhécen
Cumo ye l miu deber
Hoije bou-me a apersentar
A la quadrilha anton
Eiqui stá l pimpon
Que bos quier desear
Un santo die a brilhar
Ne l buosso guapo corteijo
Cumo para mi deseijo
Que bos cuorra bien afinal
L miu será eigual
You sou tetrapleijo
Chamo-me José António
Pa ls nietos abó Zé
Ye perciso tener fé
You bos digo outra beç
Stés tu adonde stés
Nun baia l diabo a tecer
Sprai anton para ber
Cumo amanhece l die
Que corrisse bien you querie
Nun l bou you a scunder
Ye grande mi sastefaçon
De a la quadrilha pertancer
Mui feliç eirei you a ser
Digo-bos de l coraçon
Grande quadrilha esta anton
Digo para nun bos squecer
Que agora stou you eiqui
Melhor quadrilha nun bi
Digo als que nun la conhécen
Para todos muita salude
I que la sában stimar
Agora stareis a trabalhar
Que esso ye ua bertude
Pido a Dius que bos ajude
Que el ten esse poder
Pus manhana eireis a ber
Cumo stan las einergies
I you bos dou ls buns dies
Cumo ye l miu deber
José António Esteves
Subscrever:
Enviar feedback (Atom)
5 comentários:
Esto ye que ye ampeçar cun ua gázpia... amigo Jesé Antonho! Nun dezistes ua cousa na buossa apersentaçon, mas esso bei-se lhougo: ye que sodes poeta, i que poeta! L restro alhá eiremos sabendo.
L buosso poema ye mui guapo subretodo pula fuorça que ten andrento i que a todos nós se mos trasmite i ampeçais a dezir algo que amostra bien la buossa tempra: you sou tetrapleijo.
I tamien sei que l mirandés, para alhá de outras cousas, bos ajuda a passar ls dies i bos ajudar a dar ua buolta a esses dies, i la buossa jolda dá-mos un cacho mais de alegrie, que estes tiempos ándan mie tristes.
Assi, stais tamien a dar un cuntributo einestimable para este património tan grande que ye la nuossa lhéngua.
Ye ua eimoçon mui grande, ber-bos falar assi i tener-bos acá. Que dius bos ajude, la coraige nunca bos falte, i que la bena de poesie nunca deixe de correr: mas mirai alhá ua cousa, tenei cuidado culas musas, que eilhas son meio andiabradas, mas anton guapas, nin bos digo...
Un abraço amigo,
Amadeu
Que buono saber de bós, zde l brano passado.
Puis tiu Jesé Antonho seiades biembenido.
Nesta quadrilha cabe to l mundo i un amigo cumo bós yá tardaba.
Agora nun ye solo pul Jornal Nordeste que saboreamos la buossa poesia.
Ls mius parabienes, puls poemas i la nuoba chegada a la família.
Un abraço
Faustino
Permitam-me um comentário em português para vos enviar um prémio mais que merecido:
http://regressoalisboa.blogspot.com/2009/02/regresso-lisboa-recebeu-o-premio-vale.html
Abraço!
Buonas nuites tiu Z'Antonho!
You nun bos cunheço, ou por outra, solo bos cunheço de ls bersos de l Nordeste, mas quiero-bos dar ls mius parabienes!
Por bárias rezones que se puoden dezir an dues:
purmeiro puls bersos eilhes mesmos; i apuis pula buossa "arte de bibir" que reçuma desses bersos i de la buossa bida!
Bien benido! Carai, home, teniedes que benir i tardábades tanto!...
Abraço arrochado,
Alfredo
Buonos dies Jesé Antonho,
Muitos parabienes pula buossa poesie, mas an special por assumirdes la buossa çfrença física i cun eilha de braço dado cul mirandés,lhéngua que scolhistes para botar para fuora la guapa poesie que an bós reside. Parabienes i cuntinai siempre.
Un abraço,
Francisco Domingues
Enviar um comentário