Reçúman lhágrimas las peinhas
Hai delor na giente, nos caminos, nas jinelas.
Curjidosos ousérban nas muralhas
aquel carro cun soldados i cornetas,
spingardas i mortalhas.
Reçúman las peinhas lhágrimas sufridas:
Gotas d’ourbalheira pula piedra a resbalar
fázen crecer l’augueira an canalon
que l Frezno apanha, cun passion,
para remortigar maleitas de sous filhos a chorar.
Un siléncio de fromigueiro apesta la calçada
i l negro lhuito an prociçon
zde la Sé a la última morada.
Al cielo apúntan las spingardas
teçtemunhas de zgrácias tanto anho,
acontra l’aire, sien balas, dan trés tiros:
Barrenos que atelóndran todo l Praino.
Tamien retómban nas arribas las notas de l clarin:
Acerca, fuortes, más loinge, debagar,
até quedar un tiempo lebe, quaije sien fin.
L tou, segado antre l morrer i l matar.
Abelhón, 10 de Febreiro de 2009
3 comentários:
Buonos dies,
Estas houmenaiges, traiendo a la lhembráncia un tiempo negro que nun hai que squecer, un tiempo que cuntina a boziar pul silenço de ls semitérios i ne ls uocos que nunca mais naide anchiu.
Bien haias Abelhon, mais ua beç.
Hemos de achar modo de que estas houmenaiges báian mais loinge, até ne l tiempo, pus todo aqueilho que un poeta agarra nunca se muorre de beç.
Un abraço,
Amadeu
Gustei de ler.
Cun estes tous teçtemunhos chamas al de riba muitas recordaçones, nun amporta se son malas, tenes essa coraige i queda bien, tamien ye un modo de adomina-las i nun squecer. Essa segada que la maldita guerra fizo na jubentude deste Paiç
Durante dous anhos passórun muitos (sien fazer mal a naide) ancaixotados por adonde you staba (N.R.P. João Coutinho)
Un abraço
Buonos dies Abelhón,
Mai ua beç i de un modo mui galano, lhembras l que fui l sofrimiento de muitas familhas de l nuosso Paiç i an special ne l Praino Mirandés.
Bien haias i cuntina a lhembrar ls que alhá tombórun.
Un abraço,
Francisco
Enviar um comentário