Talho

*

Talho (talhico) de çapateito

Esta cousa (pieça), que s'aparece a ua ruodra i nun roda, ten trés pies i nun anda, ye un talho (talhico, assiento). Tamien sei que era dun çapateiro, adonde staba sentado anquanto metie uas gáçpias nuns çapatos, uas brochas nuas cholas, fazie uas polainas i todo l mais que ye sue arte.

Este talhico de l’eimaige stá ne l Museu/Lhagar de Zenízio. Yá percurei se fui la família de tiu Zé Marie, de tiu Domingos, se tiu Abel que l oufereciu, mas squeci-me. Mas al que amporta ye que ye un géstio de lhoubar.

A la mie mimória ben-me muitos outros eilustres çapateiros de l’aldé, alguns deilhes inda bibos mesmo que nun trabálhen na arte. La mie oumenaige a todos eilhes, tius afamados ne l sou oufício, de quien mos quédan muitas i guapas cuntas ambersadas por eilhes ne ls dies amberniços passados na sue cumpanha ne ls cabanhales.

De todos ls que se morrírun, quiero lhembrar l tiu Zé Marie Barbeiro que por fazer la arte de çapateiro a tiempo anteiro, ser bezino, pai dua galana família i home de muitas chalaças, mais m’acuordo. I cuido que ls de l mui tiempo tamien.

Agora este talho bien amanhadico, cuas pequeinhas çfrenças de ls demais, ten uns buracos na foia que debien dar muito jeito a quien l ousaba muito tiempo. Era de çapateiro, i staba oucupado l die todo, sumanas, meses i anhos a filo. Era cumo ls armanos, dun aporbeitamiento de l cacho que salie de las cambas de ls carros de bacas, que apuis s’abrien trés buracos cun trado i se ponien trés pies.

Éran pieças amadas, merécen un lhugar ne l museu, yá que hoije solo stan na prieça de nuossa casa para anfeitar. Mas dantes, quantos nun fúrun ls que apuis dun die de lhabra, de scabar ua binha, de arrincar touça, neilhes sentórun l culo. Atamórun la sede cula bota de bino, lhimpórun l sudor, saboreando un carolo de pan cun cebolha.

Abençonados séian ls talhicos.