L caldico

*

L caçuolo adonde quedaba l miu caldo

Se las códias (ou las forfalhas) de l cerron pa la tarde buonas son, puis you digo-bos que l caldo de l caçuolo a meidie nun era pior.
Stou a screbir subre quando andaba na scuola purmaria (1955) mais l miu armano mais nuobo. Íbamos a almorçar a casa, cumo ls demais, i l que teniemos para almoçar era l caldo ne l caçuolo deixado por nuossa mai, que l habie purparado antes de s’ir pa la lhida de l campo, a tratar de la huorta, de la cria i de l ganado.
Nós, campantes de la bida, siempre al borralho de l lhume teniemos un caçuolo de caldo quaije siempre de berças i adubado cun unto ou toucino, que mos deixaba ls beiços bien lhambusados.
Quando scribo subre estas cousas dantes, tamien penso an quien las bai a ler, se son de l miu tiempo i coinhécen bien estas bibéncias, se son mais nuobos i l’eideia que fázen destes teçtemunhos. Assi i todo yá tube comentairos que son animadores i que le gusta bé-los, que son un modo de respeitar un pobo i la sue mimória (dezírun Ana Marie, Amadeu i outros) ye siempre buono saber l passado i del nun mos ambergonhar-mos. You tamien cuido, i sei que l pobo que nun squecir al sou passado bibe melhor l presente i porparará melhor l feturo.
Inda hoije tengo bien claro l que ye querer, poder i tener caldo para quemer i nun era solo dantes, ne ls dies de hoije hai muitos que nun l ténen.
Tener caldo para quemer era i ye nun passar fame. Tené-lo era seinha que las cousas íban a carreiro. Quaijeque siempre que me percúran cumo bai la vida, digo que acá bou quemendo l caldo, cumo a dezir que stan bien.
L caldo tenie un balor para ls mais bielhos, muis abós i pais al nible de ato sagrado, lhembro-me que eilhes a la cena tenien que quemer siempre caldo, cenar sien ua malga de caldo nun era cenar, quedaba ancumpleta, dezien que la barriga nun quedaba aquemodada sien el. Podie nun haber ganas de mais nada mas un caldico antes de la deita siempre se fazie campo para el.
Cunfesso que you i miu armano alguas bezes torciemos l nariç.
L que miu pai dezie lhougo, nun l quereis quemer nun bos cunsúmades, queda ne l caçuolo, i la regla ye esta, a la fogaça i a la chica solo ides apuis de quemer l caldo.
Inda nun m’afiç de todo a caldo.