01/09/07

La segada

*
La merenda nas eiras



An Julho deste anho bibi un die cheno de eimoçones, rebibi tiempos yá de la mie anfáncia, cerca de 40 anhos yá bolbidos, mas que you quiero partilhar culs mius amigos ponendo eiqui neste ”nuosso” blog por meio deste miu mirandés assi un pouco squesito, mas cuido que dará para antander toda la eimoçon que bibi l die 28 de l passado més quando, an biaige de Caçareilhos para Bregáncia, bi assi bien arrimadico a mi ua cousa que me fizo mais nuobo, que me fizo nun stantico bolber cun muita suidade i eimoçon als tiempos de la mie anfáncia.
Éran las 10.00 horas de la manhana. Pul camino ancuntrei ua segada, ua camarada de segadores, alhi al bibo. Para mie tristeza yá habien acabado la segada de la cortina de l trigo mas inda dou para ber ls segadores a fazéren ls manolhos, l almuorço assi bien a la moda deilhi a la selombra dun carbalho, cun pan feito ne l forno comunitairo de l'aldé, bacalhau fertido ambuolto an uobos, peçpierno cozido, chouriço, choclate caliente, bino an calabaças i tuodo ne l chano an riba duas toalhas de lhino assi bien a la moda dalhá. Aspuis, ls segadores bolbírun pa l restroilho, fúran-se a ajuntar ls manolhos, a fazer la meda i lhougo apuis fazírun l acarreio, l bornal nas eiras, l eirado, la malha, la parba i la lhimpa de l trigo.
Assi, you i la mie tie, rebibimos tiempos i tubimos la felcidade de amostrar al miu fiho Juan esta cousa tan guapa que yá nun ye fácele de ber, mas que bimos alhi bien na frente de ls nuossos oulhos, l carro de l acarreio culs burricos, bardeiros de codesco assi spalmadicos, la bienda, l biendo, l rastrico, ls manolhos, la pala, l cuolmo pa ls xaragones i todos ls cunferrumes lhigados al ciclo de l trigo i que nun registo a poner ne l blogue alguns retraticos para assi partilhar esta mie felcidade cun todos aqueilhes que cumo you áman la sue tierra i las sues tradiçones.
José Ventura

Sem comentários: