07/09/07

La benediça


cato


Poneis eiqui muita frol, hoije you tamien me arresolbi a poner la mie. Nun ye un cardo, mas anda alhá perto. A bien dezir, you nisquiera le sei l nome. Mie mai diç que ye un cato i you finto-me neilha, que remédio tengo! Nun será assi ua frol mi mirandesa, mas esta yá stá porqui hai tanto tiempo – hai quaije 40 que ando you i eilha yá acá staba - que yá se puode dezir que tamien ye d’acá. Fai de cuonta que ye benediça, assi a modos de ls barragistas: bieno, gostou i quedou. I tamien se puode siempre preguntar: l burro ye donde nace ou donde pace?
Buono, esta ten-la mie mai nun caco an la baranda, i digo-bos yá que datrás nun me gustaba nada.
Muita beç la çafardana me çcubriu las antradas tardiegas, quando las froles aparcien pul chano a la purmanhana:
- Anton, onte, tan trocido benies, que çfolheste l cato todo al passar?! Fui la carroça que traies que nun cabie ne l passadeiro ou quei?!
- Quei!
Ye que l xodairo nun se le puode topar que se le scóchan lhougo las froles!
Stube bai nun bai pa lhebar camino, alma de l diabo de l’acusa Cristos!
Mas nunca tube la coraige. Cuitadica, dou-me pena deilha, al fin de cuntas yera ua frol! I, tamien, cumo haberie you de anrodilhar pa splicar l semiço, quien se iba a fintar que habien roubado un caco cun froles.
Inda bien que assi fui!
La mie filha anda agora a daprender a andar. Yá bai fazendo teres, mas ténen sido muitos cachos de spina drobada, a segurar-le las manicas, eiqui me caio, eiqui me alhebanto!
Quereis saber que nun passa pul diabo de la frol – ye cumo quien la ciega - que nun se abornale ne l chano, a scochá-la, a retrocer las froles an las manos, a las risadas, aquilho ye cumo un pito nua buosta! Tamien, las frolicas peç que son de cera, ou de borraixa…ou de scuma!
Abançoada! Siempre son dieç minutos de çcanso i tiempo pa un cigarrico. De spina dreita!
I, de más a más, ye cumo diç l outro: quien me beija ls filhos, adoça-me la boca!


2 comentários:

AF disse...

Siempre me gustou la nuossa palabra 'benediços', i quedo cuntento por saber que tamien se usa an San Pedro. Se la tue filha gusta de l cato esso ye porque algue grácia le ha de achar.
Apuis, querie te dar l parabienes por mais este testo que ye un regalo de ler, parece que canta cumo las ribeiras i lhieba cun el la frescura deilhas. Só nun antendo cumo cunsigues esso, que yá stamos ne l setembre que seca ls montes i an que las ribeiras yá nun cuorren. Mas la tue nun para de correr. Inda bien.
Oubrigado.

Tortulhas disse...

Son las buossas buonas palabras de siempre!
Lhembra-se-me que las ribeiras de que falais nun pássan de uns poçacos de auga chuoca. Se al menos inda alhá se podira ber la lhuç de la lhuna retratada....