Nun ye caçuar

*

L die de ls prémios an Bumioso

Ua de las muitas cousas que las bacances ténen de buono para mi, ye poder passar l mais de ls dies por aqueilhes sítios adonde naci i medrei, a dar uas rondas. Porque l restro de l anho nun tengo bagar.
Stou a falar de l Nordeste Stramuntano.
Rebibir i besitar ls sítios, ber las cousas, scuitar las pessonas i muitas bezes botar-me a la fala, percurando donde son i dezir-le donde sou, ye de l que me gusta.
Hai cachicos de tiempo, que bálen por anhos, hai cuontas que mos quédan para siempre.
L que bou cuntar, bal l que bal, i ten la grácia que le quejirmos poner, nun ye caçuar de naide.
Ne l die de San Lurenço todos ls anhos se fai la scuolha pa ls prémios de la cria (bacas, buis, bitelos, bitelas) de l cunceilho de Bumioso. To ls que son destas tierras sáben que a las bacas i als buis se le ponie nome, i muitos desses nomes éran bien guapos, cumo pimpona, cereija, maçana, princesa, rola, castanha, rufina, cordeira (anté ua beç la mie amiga Neuza de Bilasseco fizo ua guapa stória, cul títalo “La baca cordeira"), bonita, ou bonito, baliente i que sei you, muitos assi.
Astanho you a la chegada dun de ls purmeiros buis al Stádio Munecipal, streformado an toural (i chegórun muitos) precurei-le al tiu, sou duonho, mais para ambersar un cachico.
- Que nome ten l buosso bui?
L que el arrespundiu.
- Mourinho.
I, sien perder tiempo, acrecentou lhougo,
- Merquei-lo de nobilho i yá l trazie.
Outro tiu que era de l’ourganizaçon, puis andaba cun cadernico na mano, quando oubiu l que you percurei, tamien dou ua ajuda i dixo:
- An Binhais hai outro.
La cumbersa quedou por ende, mas será que este património de las tierras de ls Zoelas tamien ten sido un ganhador cumo l outro por tierras de sue magistade, ou l nome ye solo fanfarroneç? Pul que you dantendo l bui Mourinho ye mesmo baliente nun fusse el un mirandés.
Quando you era garoto, fai tiempo, i miu pai mos deixaba scolher ls nomes, cuido que deste naide s’íba a lhembrar.
Cousas d’agora.