Un cachico más felizes

Quadros de Teresa Almeida, sacados deiqui

Cunforme ambora dada eiqui, na sesta, die 16, la porsora Teresa Almeida, nuossa camarada eiqui de la quadrilha, einougurou ua sposiçon de pintura – Pinceladas Poéticas - i apersentou l sou purmeiro lhibro de poemas - Ousadia. Fui ua fiesta mui bonita i bien merecida! Ye ua pruoa para todos eiqui tener ua camarada desta culidade.

You amento nisto por dues rezones: a la ua, para le agradecer i renobar ls parabienes a la porsora Teresa i dezir-le que yá stamos a spera de la cuntinaçon; a la outra, para le amostrar als que nun tubírun la suorte de haber stado alhá dous testos subre la pintura/poesie de la porsora Teresa que son, eilhes mesmos, tamien dues obras de arte:

L purmeiro de la tamien pintora i poetiza mirandesa Adelaide Monteiro, si, la nuossa Delaide.

“Arrebenta la ousadie an telas i poemas, a la par d´ua cierta suabidade i einocéncia capazes d´amerosar fraguedos ne l sou modo mui própio d´ apaziguar todo l que stá a la borda deilha.

Béilan las lhetras dun poema nas saias sbolaciantes de la beiladeira de rapassiado, an manchicas cun ganas de salir de la tela, ampuxadas por baláncios de la música que d´andrento de l´outora bai salindo.

Na scrita i na poesie, Teresa Almeida stramite serenidade, al miesmo tiempo que spechuca l deseio de rumper regras, de passar lhemites.

Oubrigada Teresica, por todo l que mos dás!”

L segundo, de Júlio Meirinhos, Bice-Persidente de l Turismo de l Porto i Norte de Pertual, antigo Persidente de la Cámara de Miranda i, nunca será de mais repisá-lo, “pai” de la Lei que recunheciu la Lhéngua Mirandesa:

“La lhuç debelgada por remiles de cintas-de-raposa arramaba-se pula tierra mirandesa. Apuis, la mano hable de la pintora ajuntou-la i angalanou-la. Tenhiu cembones de eideias: dou-le sabor a quelores amerosas, cheirosas daquel dóndio caliente que las palabras inda nun aprendírun a dezir, mas que ls uolhos ampálpan ne l scurrir de las selombras. Prendiu ls spetros cul feitiço de l sou mirar azul zberdiado, i pa ls oubrigar a dezir l sou mundo, zlingou-los de guapos barandins, donde cuorren riqueiros de formas mansas. An “Pinceladas Poéticas”, Teresa Almeida amplacha las paisaiges de ls sous mirares, para lhougo a seguir las ampimponar a rigor, todo, solo para mos fazer un cachico más felizes.

Que Dius te lo pague, Marie Teresa”