Quando las oubeilhas de Dius se pónen a cantar…(2)

Se depuis desto nun tubisse mais nada que dezir, este testo nun balerie na realidade un segundo ser screbido... si, porque inda aqui toda la giente se lhembra que nestes dies nun só yá passemos muito tiempo a falar de l que puode inda representar hoije l’Eigreija antre nós... cumo tamien nun mos deixa nada andefrente l facto de starmos por acaso an crise i de l paíç que ye Pertuel – cumo an tiempos tamien acunteciu cul Brasil - precisar talbeç cumo nunca de l famoso FMI...

Cun que anton... Eigreija... FMI... i neste todo: Brasileiros, ua cierta Giane, cumo tamien ua cierta Armana Sunrisa (L nome de cena deilha para l mundo de las Bariedades)... i tamien mas subretodo esse nome “Dominique” i cun essas dues últimas sílabas repetidas pul menos 14 bezes na berson an francés (i outras tantas na berson brasileira...) Puis, porque talbeç me tenga squecido de dezir que la moda fui afinal screbida purmeiro an francés... i sien precisar sperar muito tiempo para l dezir: toda la giente rapidamente se dou de cunta de todo l lhado redículo que habie finalmente nessa cançon... la moda tubo sucesso porque na realidade las pessonas se fartórun de rir i dében de haber pensado na altura: essa moda ye mesmo para dar cabo ua beç para todas de l’Eigreija i de ls sous dogmas!

Porquei? Cuidado que inda nun spliquei todo! Tende paciéncia! Cumo sabeis, tanto cumo you: Roma i Pabia nun se fazírun nun die!

Yá bos bou a splicar mas antes inda bos quiero dezir que la moda cuntina hoije mui atual... percisamente zde que aparciu l caso relacionado cun DSK i bonda ir a l’Anternete ou oubir ciertos houmoristas, aqui an França ou ne ls outros países francófonos pula cierta – a esse respeito nun hai que squecer todos ls países africanos ( tamien nun fáltan) an que l francés ye tamien la lhéngua oufecial – para qualquiera un se dar de cuonta que hoije hai quien se ria tamien cul que se stá a passar cul home político francés (Que parece que até ten un antepassado que chegou a ser donho dua casa de prostituiçon) mas inda nun hai muito cunsiderado cumo un de ls mais prestigiados, respeitados i poderosos até a nible mundial mas hoije bisto cun muita suspeita quando nó yá rejeitado i descreditado... i acuntece que hai quien se ria tamien afinal por bies de l relacionamiento que muitos fázen agora cula moda dessa tal armana Sunrisa, ne l Cielo steia!

L que falta anton splicar inda ?

L mais amportante! Aqueilho que nien sequiera chegórun a splicar a todos esses Brasileiros que chegórun a ber ou a tornar a ber la mui romántica mas finalmente cumpletamiente arrepassada Giane, nesse programa de la telbison, an 2006... Claro que se fusse hoije i cun Dilma i todo, talbeç las cousas seian defrentes, ye de sperar que si !!

Puode parecer mintira (mas esso tamien ye rebelador de l’eignoráncia ou de l’eiluson an que l’Eigreija ancerra las sues tienras oubeilhas!) mas custa acraditar que la tal freira dominicana de l cumbento de Waterloo (Sabendo esso, Waterloo!!, tamien ls Franceses mais cultos – mas tamien ls mais astutos - se dében de anchir inda hoije de rir... ou de chorar i rir al mesmo tiempo) tenga screbido la lhetra dessa moda “Dominique, nique, nique”, pensando apenas que las pessonas irien achar graça a la repetiçon dessas dues sílabas, i eignorando anton totalmente (ou dando a antender que eignoraba ? Inda hoije stamos ne l dreito de tentar saber) l que yá ne ls anhos 60 podien tamien segnificar essas dues sílabas...

Mas ye probable que eilha, ancerrada ne l sou cumbento de l centro de la Bélgica, inda nun soubisse, por acaso, l que l berbo “niquer” (aqui cumo se stubisse ne l amperatibo!) querie yá dezir i sien ambiguidade ningua para muitos - an special, na Argélia que staba an bies de adquirir la sue andependéncia an relaçon a la França, l que acunteciu finalmente an 1962 - ne l falar arabizante que ende anton se falaba zde pul menos l fin de seclo XIX.

“Nique, nique!” puode ser por acaso ua repetiçon (cousa que salta als uolhos!) mas quier dezir tamien nesse falar que ancontra la sue ourige nas ex-colónias francesas de África de l Norte, nada mais nada menos que qualquiera cousa cumo por eisemplo “Fode, fode!” tamien ne l Amperativo cumo qualquiera un puode ber... “Niquer” diç l miu Robert (Ye l nome de l miu dicionairo francés i nó de l miu home que tampouco se chama Demingos, só faltaba essa agora!), quier dezir, i eibidentemente nun francés ampecable cumo nun podie deixar de ser: “Posséder sexuellement” . Nien traduzo, stou cumbencida que yá antendistes todo. Spresson que hoije an die ciertos jobes nun s’ampórtan de usar, percipalmente antre aqueilhes que son filhos de pais de ourige magrebina: “Nique ta mère!” dízen eilhes cumo forma d'anjúria antre las mais graúdas... cumo quando un diç an mirandés nada mais nada menos que: “Puta que te pariu!” (mas que Dius me perdone porque you sou ua que nunca la uso i até sou capaç de sancionar un aluno se por acaso se ponir, el, a falar tan mal, cun que anton! Só faltaba essa, falar dessa maneira i dezir assi tan mal de las mais !)

Mas la mie splicaçon nun serie cumpleta se inda nun bos dezisse mais alguas cousas...
Parece mintira que la cuitadica de la freira nun soubisse bien l que staba a cantar ou que nun houbisse naide que la houbisse anformado i acunselhado prebia i corretamiente para eibitar l que acabou por acuntecer uns anhos mais tarde. Eilha acabou por se suicidar arruinada i chena de díbidas mas houbo quien tubisse ganho rius de denheiro cula moda essa. A ampeçar cula congregaçon relegiosa a la qual pertencie i a quien fúrun antregados grande parte de ls benefícios comerciales que fúrun possibles graças a la dibulgaçon an grande scala anternacional dessa moda afinal bien special .

Que dezir mais?

Esto! Un debe de meditar tamien subre l cuntenido eisato de toda la lhetra de l’outorie dessa anfeliç freira domenicana belga. Quijo eilha, assi i todo, sacralizar esse San Domingos, relegioso de ourige spanhola i nacido an 1170 cunsiderado cumo l fundador (ou anton un de ls fundadores) de l’Anquisiçon ? La respuosta parece eibidente!

Mas se assi ye, ye eibidente tamien que la moda se tornou rapidamente cumo ua bomba!

BUMMMMMMMMMMMMMMM !!!!!!

Mas anton porquei ?

Para las gientes de Miranda cumo para todos ls Pertueses que ban a tener que l pagar tamien l précio de la crise, l nome de Dominique hoije nun puode nun fazer pensar ne l FMI... mais inda talbeç que ne l santo esse de l seclo XII i XIII que uns (ou subretodo uas?) quejírun inda cuntinuar a sacralizar finalmente ne ls anhos 60 de l seclo atrasado... i quien diç San Demingos, diç tamien l’Eigreija afinal i antre todas las cungregaçones, la de ls domenicanos...