Baco a Persidente

«

CORO

Stamos an Tebas,
Cidade fundada pul antigo rei Cadmo,
Pai de Ino, Agabe, Antónoe
I de la guapa Sémele, que çpertou la paixon de Zeus,
Dius de ls diuses i de las termientas.

Anque casado cun Hera,
Diusa ciumenta i bingatiba,
Zeus namorou a Sémele,
Ancantou-la i amprenhou-la.

(...)

Para se bingar,
Hera fizo a Sémele dubidar de Zeus
I cumbenciu-la a pedir-le que s'amostrasse na sue berdadeira forma.

Dies mais tarde,
Quando se ancuntrórun,
Sémele oubrigou a Zeus a jurar que cumprie un pedido deilha,
Fusse qual fusse.

Bien loinge de manginar l anganho de Hera,
Zeus jurou cumprir la buntade de Sémele
I eilha pediu-le que s'amostrasse tal cumo ye.

(...)

Peneroso por coincer las cunsequéncias de tal pedido,
Zeus cumpriu la pormessa:
Streformou-se nun truono
I matou la probe Sémele,
Que se morriu lhougo eilhi.

Mas l nino subrebibiu
I Zeus puso-lo na própia pierna
Para ende acabar la gestaçon.

Ye por esso que el se chama Ditirambo,
Aquel que naciu dues bezes.

Tamien ye coincido por Brómio, Diónisos ó Baco.»

Cacho de Las Grandes Dionísias, pieça lhibremente anspirada ne l mito de Baco i an Las Bacantes de Ourípides

I pronto, stá resolbido l mistério! De quien staba a falar l senhor persidente de la República quando dixo que tenemos de nacer dues bezes para sermos mais hounestos do que ei? De l dius Ditirambo, Brómio, Diónisos, Dioniso ó Baco, que anfeliçmente nun ye candidato al cargo.

You botarie nel, anque tenga stado contra ls lusitanos ne l Cuncílio de ls Diuses i de ls stratagemas qu'arranjou para tramar la bida a Basco de la Gama. Esse cumportamiento ten, a miu ber, dues atenuantes.

Purmeiro, Baco tenie miedo que la glória de l pobo pertués podisse ancubrir ls feitos del. Oura, an las circustáncias atuales, la glória de l pobo pertués nun ancubre a naide.

Segundo, esses stratagemas fúrun todos ambentadas por Camões. Stou cumbencido que se Luís Baç coincisse ls feitos dun cierto adorador de l dius bolho-rei i de ls diuses mercados contra l pobo lusitano, dieç cantos nun le chegarian para Ls Lusíadas. Se, para alhá desso, Camões soubisse que parte de l pobo pertués quier cuntinar a botar nessa figura, zistirie lhougo de l'eipopeia.

Cun Baco an persidente, serien betados qualesquiera atentados a l'agricultura (pan i bino era l lema de ls pobos antigos), a las fiestas i al Triato. Cun Baco persidente, ls speculadores que ándan a ganhar denheiro culs juros de la díbeda pública tenerien ua suorte bien pior que la de Penteu (muorto pulas Bacantes, antre las quales staba la própia mai). Cun Baco persidente, talbeç l pobo tornasse a tener rezones para festear.

Anfelizmente, ls políticos (i l pobo) cuntínan a adorar ls falsos diuses Mercados. I ye ende que stá l'Ourige de la Traigédia.