29/01/11

Querie ser ua motosierra





Querie ser, ua motossierra
Para delgeiro you quemer
Maçcar i buotar fuora
Que angulhir nun puode ser


Que era para quedar a saber
Cumo serie l resuoltado
Quedarie todo deborado
Nin daba tiempo para ber
Tan pouco, tiempo d´antander
L que se passaba na sierra
Andarie de tierra an tierra
Para mustrar la mie suorte
Para meter un miedo de muorte
Querie ser ua motossierra


Strinçando tudico a eito
Serie assi la mie bida
Nun me faltarie quemida
Nin you l punerie defeito
Pus haberie siempre un jeito
De las cousas you fazer
Farie-las siempre a correr
Nada se me punerie delantre
Farie-las todas nistante
Para delgeiro you quemer


L que irie acuntecer
Cun tan grande diabrura
Quemirie l pan cun fartura
Anté la barriga ancher
Nin darie tiempo para you ber
Cumo funcionaba agora
Fazie-se todo na hora
Mordendo eiqui i eilhi
Serie assi que you farie
Maçcar i buotar fuora


Naide me lhebarie la delanteira
Na hora de you cenar
Quien me puoderie igualar
Cuns dientes dessa maneira
Passarie mie bida anteira
Procurando cousas que quemer
Para la fazer zaparcer
L darie quatro dentadas
Pa l lhado serien atiradas
Qu´angulhir nun puodie ser

José António Esteves





Sem comentários: