Daprender lhénguas

Cumo ne l Demingo que ben, die 26, se celebra l die Ouropeu de las Lhénguas, i apuis puode nun se me ajeitar, deixo yá eiqui hoije la mie smola par’essa mardomarie.
Ye ua cuntica, mi singelica, mas que a mi me gusta siempre cuntar, mormiente agora que ampeça la scuola, a mode d’amostrar bien la amportança de daprender ua lhéngua strangeira.
La berdadeira ye cun dous tius alantejanos, mas a mi nun sei l que me parece poner ls alantejanos a falar mirandés, peç que nun queda assi mi legítimo, de maneira que quédan dous tius, cumpadris ó nó, bós manginai-los adonde quejirdes, para la moralidade de la cuonta dá eigual, al menos assi naide me acusa de politicamiente ancorreto.
Diç que stában anton dous tius sentados nun puial i pára un carro, sal d’alhá un casal de turistas i bai i arríman-se al puial i procura-le l home de l matrimónio:
- Do you speak english?
Ls nuossos heiróis mirórun un pal’outro, ancolhírun ls ombros i acenórun cun la cabeça pa ls lhados, i torna l turista:
- Parlez vous français?
Outra abanadela de la cabeça i acenos de nó cun la mano, i anton procura-le la tie de ls strangeiros:
- Sprechen sie deutsch?, Dius te libre!, que trabalheira para ber de saber cumo se screbie isto; i nun stou cierto de haber acertado, isto de querer fazer parecer las cuontas berdadeiras ye ua canseira, i ls homes nien chite nien chote i bai la tie yá cun cara d’anfado:
- ¿Hablan español?
I eilhes nada, i cumo aquilho nun ataba nien zataba, bai un de ls homes i acena-le al para baixo, a caras a la praça, anda que na taberna nun deixarie de haber quien le pudira dar las anformaçones, i apuis de ls turistas se haberen ido, bai un de ls homes i diç pa l amigo:
- Ah tu, nós, calhando, tamien habiemos de daprender ua lhéngua strangeira.
- Nun bal la pena, home.
- Bó, anton porquei?, anton nós somos menos que naide?!
- Nun ye isso home. Ye que nun bal la pena… anton tu nun beis?... Estes dous bien deilhas sabien i de pouco le serbiu.