Quien te biu i quien te bei

Todos nós cul correr de l tiempo, sien querer, muito ou pouco, bamos zamouchando las nuossas manhas.

You até cuido que nun hai mal nanhun, que mal puode haber un rebelar de l que gustaba quando era mais nuobo, relhembrar cumo bie l mundo dantes, las maroscas que pregaba i que le pregában, ls castielhos que custruie an suonhos.

You quando fui a la scuola, na purmeira classe ua de las cousas que mais gustaba era de zenhar altemobles, gataba-me fazer uns riscos dreitos i cuas buolticas adonde ponie las ruodras, se calha era porque la scuola quedaba a pie la strada nacional i nesse tiempo l xefe de ls cantoneiros tenie un i passaba ende muitas bezes.

Yá na segunda i terceira classe siempre que la porsora Regina (nunca la squeci, filha de l capador d’Angueira, tenie cun nós rapazes ua relaçon d’amizade que passou para alhá de porsora i de scuola) siempre que pedie eilustraçon lhibre pa la redaçon you zenhaba l retrato de l grande, eilustre, çcubridor i nabegador “Basco das Gama”.

Chego a percurar porquei esta cegueira de zenhaba este tiu.

S’el nunca porqui passou, se l conhecimiento que you tenie de l mundo nun era maior que un cachico para alhá de las marras de Martinç Fernandeç, para quantos mais saber adonde quedaba la punta de Sagres.

L mar adonde moraba l adamastor, esse anton staba tan loinge cumo staba l cielo. Benie ne ls lhibros era berdade, cumo benien ls grandes i eilustres feitos de ls pertueses por esses mares nunca dantes nabegados, cumo benien ls feitos de ls abiadores, scritores, guerreiros, çcubridores, melitares, houmanistras, reis, reinas, fidalgos, frailes, bassalos, panadeiras, cartolinhas i tantos outros que culs sous feitos, zambaraços i balenties, fuora i andrento, tanto angrandecírun i ponírun Pertual a la par de las demais naciones de l’Ouropa.

Quien zenharie you hoije?

Ou dezido doutro modo, adonde stan hoije las buonas referéncias para angrandercer, amostrar l camino als que inda nun conhecendo l mundo, nel aposítan spráncias i de quien quieren tener ourgulho.

Quien te biu i quien te bei, i un pobo percisa de buns eisemplos, percisa de ancuntrar ne ls outros referéncias, motibaçon.