30/09/10

Hei-de pintá-te



Znhei-te an fuolha branca cun un lhápeç negro de grafite. Anquanto passaba bárias bezes l lhápeç cun la lhebeza dun suonho pequeinhas curbas deixadas al correr de la punta de la grafite até que chegaba a la forma final, you iba sentindo ls tous queixumes de stares ancerrado nua touça, subre un manto de folharascas apodecidas, tu que sós tan eizuberante. L´aire abanou-te las pétalas para que te bisse ls stames cargados de puolos amarielhos i apuis sunriste-me.
You sunri-te i mergulhei an ti, ne l tou quelor de rosa, patalhobo de las buieiras.


Apuis fui zenhando las fuolhas, deixando l lhápeç correr lhibre pulas curbas de las sues formas, mais uas selombriados, mais uns risquitos eiqui i eilhi para fazer ls bretones, até que se formou l ramo cumpleto. A cada beç que cerraba ls uolhos, nun singelo abaixar de pálpebras, an piçtanhares un pouco mais debagarosos, bie-te i oubie tous sonidos. Las benas berdes de las tues fuolhas anceradas fúrun sangre que als poucos me fui correndo an mius beneiros, cada beç mais sangre, cada beç mais eimoçon de te tener por acerca...

Siempre gustei de ir cun las bacas para Antonho Steba, adonde habie patalhobos i un infenito por hourizonte. Nesse cielo tan eimenso adonde seguie ls rastros de ls eiroplanos de l que solo se bie l puntico a relhampar. Iba até la fin de l mundo, anque l miu mundo fura pequeinho, mas que nas figuras de libros se me amostraba mais grande. Iba mais loinge, ne ls suonhos a medráren-me mais que ls pies que solo me lhebában a Zenízio a las bacinas ó a Miranda ó San Martino als eisames.

Hei-de pintá-te patalhobo i, cun las pinceladas apressiadas, hei-de sentir la tue sede de abintura ne l meio dessa solidon apertada antre trampos, sien beres ua alma que seia, que te ouserbe ou mesmo te corte i ponga nua jarra an riba dun atajer pregado na parede de l quarto de drumir, mirando pa l cruceficço cumo que a rezá-le ua ouraçon.
Hei-de cheirar l tou oulor fuorte al modo que te baia pintando...







2 comentários:

franciscobelharino disse...

Buonas tardes Delaide,

Mui guapo l testo, gostei muito.
Parabienes i un beiso.
Francisco

Adelaide Monteiro disse...

Ls patalhobos son flores cun caratel´sticas ineugualábles: la quelor, l´oulor, las fuolhas que recebírun l sangre que corriu de las flores, la singeleza ne l meio de la adbersidade. Hei-de percurá-los para poner alguns ne l miu jardim i assi nun se áchen ten solicos.
L testo saliu de rabiscos de lhapç que ye l que you fago quando tengo un papel i un lhapç: zenhar.


Beisicos a ambos a dous.

Delaide