Ls tous uolhos son de ls tales
Que s´ancontran sien abiso
Mas Dius só fizo ls tous
Por saber l peligro que fizo.
Esses tous uolhos tan guapos
Son de l quelor de l ciúme
Que queima l miu mirar
Cumo las chamas de l lhume.
Mesmo assi you miro neilhes
Fago-te eiqui, you un abiso
Porque eilhes son aqueilhes
Que cun ourgulho, Dius ls fizo.
Por isso nunca ls scondas
Nien culs óculos mais cátitos
Porque ls tous uolhos son daqueilhes
Que stan siempre, siempre bunitos.
Son bunitos i meiguitos
Que prendem l miu oulhar
Nunca scondas ls tous uolhos
Que l bunito, ye para apreciar.
Debes traze-los a çcubierto
Para se béren melhor
I deixar que seian bistos
Por quien ye bun apreciador
Que nesse grupo stou you
Que beio esse ancanto de ls cielos
Que quando you miro para eilhes
Eilhes cegan-me, de tan bélos.
Ye por isso que miro para neilhes
I para esse tou guapo mirar
Por isso cousica guapa
Tu nunca ls debes tapar.
Deixa-me que you mire esses uolhos
Que fui cousa que Dius fizo
Pus esses tous uolhos son de ls tales
Adonde un bei, tan guapo paraiso.
Estes bersos you ls dedico a todos ls uolhos que béien este jardin de froles marabelhosas. Assi cumo a las Anas, a las Adelaides, a las Einés, a las Eirenes a las Alcinas, a las Carmos, a las Binas. I a todas las Mirandésas que fázen este jardin de froles tan grande que yá apanha l mundo anteiro. Oubrigado a las que me confortan cun cousas tan marabelhosas. I a las qu´inda nun s´atrebirun a dar la cara, deixe-le eiqui un cumbite para que apareçan que séran siempre bien recebidas. You bos stou a sprar. Oubrigado.
José António Esteves
5 comentários:
Ls uolhos, jinelas de la alma!...
Tamien nos buossos tiu Zantonho,
son de un zul sien eigual
que quando eilhes miramos,
mos spelhamos ne l cielo, tal i qual.
Oubrigada, de la parte de las Adelaides
Buonas tardes Jesé Antonho,
Guapos bersos subre uolhos belos, uns berdes, outros azules, outros castanhos i inda hai ls negros que nun quédan atrás de ls outos. Son siempre guapos ls uolhos de quien mos gusta.
Un abraço,
Francisco
Mui ben tiu Zantonho. Bós sodes mesmo daqueilhes que dezis l que las noussas mirandesas merecem i gustam que se l diga. Claro que tenem uolhos guapos i cum los buossos bersos inda quedam mas pimponas!...
Cuntinuai a screbir para que muitos oulhos bos leiam. You gusto.
Júlio Igreja
Ls sous bersos anspirórun-me a mi tamien outros. Acumpánhan l poema que chegou a eiditar antes deste tamien guapo. Puode screbir que haberá siempre Anas cumo you para ler la sue poesie.
Buonas nuites a todos, que teniedes ls uolhos guapos yá you sabie, agora quedei a saber que teneis tamien un bun curaçon.
Que Dius bos pague todas las cousas guapas que me dezies, muito oubrigado, i beisicos, até outra beç
José António Esteves
Enviar um comentário