Cumbite pa la sposiçon de scultura de José António Nobre

José António Nobre a trabalhar ne l busto de António Mourinho,
que agora puode ser bisto ne l jardin de l antigo Paço Eipiscopal,
an Miranda de l Doouro

José António Nobre [Sendin, 1954] ye un grandíssemo scultor mirandés, tamien porsor, cun curso feito na Scuola de Belas Artes de l Porto. Mas ye pouco tratá-lo cumo scultor, puis zeinha i pinta cumo poucos, ten ua obra eimensa na medalhísca i la sue cerámica ye fantástica. Nun quede por dezir que la sue tese de mestrado ye ua amportante ambestigaçon na ária de l Património Rural i de las Artes Plásticas an Pertual ne l seclo XX, subretodo na tierra de Miranda, que repersenta un grande cuntributo pa l coincimiento i pa l studo de l património mirandés, mas tamien pa la lhéngua i la stória mirandesa. Speremos que un die puoda ser antegralmente publicada, anque alguns cachicos yá séian coincidos.

Cun ls sous trabalhos ten ganho muitos prémios i son muitíssemas las sues sposiçones andebiduales i coletibas, por muitos sítios de l paiç. La sue obra stá sparbada por muitos lhados, por cidades cumo Bergança, Miranda i muitas outras. Todos ls mirandeses conhécen bárias de las sues sculturas, puis son eilhas que l salúdan lhougo na strada a l’antrada de la cidade i andrento la cidade ten l menumiento al Padre António Mourinho i, la mais coincida obra, l tiu i la tie que stan na praça D. Juan III, delantre la Cámara.

Scultura de José António Nobre na Praça D. Juan III, an Miranda de l Douro

Nun bou eiqui a analizar la sue bastíssema obra, até porque un die destes salirá ua grande anterbista cun l scultor na Fuolha Mirandesa i ende haberá melhor oucajion para l fazer. Tambien yá tube ouportunidade de subre el screbir noutras oucajiones i para alguns de ls catálogos de sposiçones por el feitas.

Ben este testo a perpósito de la sposiçon de scultura que bai a fazer an Lisboua l die 19 de márcio, a las 17 horas [ye ne l sábado que ben], cul títalo de MAÇCARAS - A DUALIDADE. Todos ls mirandeses stan cumbidados i se habien de sforçar por star persentes, puis se trata dun ato cultural de alto nible, que honra la grande arte, mas tamien la lhéngua i la cultura mirandesas.

Ide, que nun bos ides a arrepender i será l ampeço de ua nuoba bison an relaçon a la cultura mirandesa i als sous artistas. Lhebai cun bós alguns amigos i assi será ua grande manifestaçon de fuorça cultural.

Eiqui queda l cumbite.

Cumbite pa la sposiçon de José António Nobre, para que todo mundo stá cumbidado. Ye na Sociedade de Belas Artes, Rue Barata Salgueiro, n.º 36, Lisboua

Amadeu Ferreira