Relhembrar

Na sumana passada, se l’anterbista de tiu Alcides al cura Zé, publicada na “Fuolha Mirandesa” de l Jornal Nordeste me deixou ancantado pula anteligéncia i fuorma cumo fui feita i las respuostas dadas, l testo tamien ende publicado de l cura “Al correr de la bida”, nun me deixou menos i até puxou pa l de riba algue que tamien an mi eisistiu.
Un die screbi un testo que será publicado mais tarde, eiqui deixo un cachico.

…Nua nuite a la hora de cenar mie mai nun staba, l caldo fui puosto nas malgas por miu pai.
Ua para mi, outra para mie armana, que tenie uito anhos, quatro mais bielha que you, outra pa l miu armano cun doze i outra para el, que nun fui quemida nessa nuite.
Angaranhido nestas lhidas de cozina, deziemos:
Buossa mais stá na cama cun delor de barriga, quedai-bos quemendo l caldo i pan cun chicha, que you bou-me a fazer un recado.
Dezie todo esso cua cara meçclada de miedo i alegrie.
Scapou-se puorta afuora i nun anstantico chegaba cun dues bezinas que fúrun dreitas a ber mie mai que staba ne l sobrado.
Essa nuite por algun tiempo fui anrezinada para todos, naide acunhou uolho, por antre l bruído de las scaleiras ioutro que hai muito nun s’oubie an nuossa casa.
Un grunhidico mi frouxico d’alguien çpuosto a lhuitar.
Sien ganas de nada pula falta de nuossa mai, soutrodie a la purmanhana alhá mos abríran la puorta de l quarto deilha.
Eilha cun de ls braços arrolhaba un nino, pequerruco, anxutico de manos cerradas mamando la teta.
Cul outro braço acenhou-mos
Beni a mi i mirai l regalo.
-Nun ye la cousa mais guapa que Dius fizo?
Acheguemos a mai cumo piticos…

Era la era de 1953, era l nuosso armano mais nuobo, Zemarcelino.
Para alhá de l que bos digo l mais amportante ye l eicelente trabalho que estes dous Cicuiranos ténen prestado a la lhiteratura mirandesa.


Este retrato nun ye dantes mas si d'agora, ye de la nieta, cumo la bida se renuoba!