You sei que l sou.

Esta ye la mie oupenion, nun bai a dreito a naide, quien sou you para dar recados, mas cuidei pur bien dar-la, porque acredito que falando las cousas, çque se tenga cuidado cul que se diç ye melhor que calhar.

I falo eiqui porque neste blogue “Frolesmirandesas” ye mui lido i ten sido la jinela de muitos Boubielhos botados a screbir, ou seia de muitos Associados de l’Associaçon Cultural i Recreatiba Nial de la Boubielha” que zde la purmeira hora apoiou, i bien, ls cursos d’aprendizaige de l mirandés, lhéngua na qual muitos se ténen rebelado cronistas.

You dei-me cunta, hai algun tiempo, que ne l ouniberso de quemunidades cun ourige an aldés de l cunceilho de Miranda de l Douro ne ls alredores de Lisboua, esta Associaçon (ACRNB) ten sido un eisemplo bibo de l sprito stramuntano.

Mas tamien tengo que acrecentar, que me dei cunta que nun hai muita giente a falar desso, será que ls Boubielhos (Zenízienses) cúidan que calhando, nun dezindo nada ye l bastante?

I esso ten sido eibidente ne l siléncio que to l mundo bota aquando l’Associaçon pormobe ls sous ancuontros. Eisemplo desso ye la falta de oupeniones, de testos que alhebánten l die de l magosto “Die de to ls Santos”, para nun falar de l pouco que se diç de l “Dous de Febreiro” de l “Jogos de l 1º de Maio”.

Ye causo para dezir, se ls associados i demais, cuidais que nun falar, nun screbir, nun balorizar l ampeinho que siempre botou an pormober las tradiçones i questumes ye l melhor modo de ajudar l’a buossa Associaçon, stais anganados.

Se nun l fazierdes naide l fai pur bós, l siléncio solo lhieba al squecimiento, se cuidais que nun ye perciso dezir las cousas, porque to la giente l sabe, puro anganho buosso. Yá dezie l mestre “fuolha de papel an branco nun diç nada, assi cumo lampion apagado nun alhumbra caleijo”

Las mies çculpas de meter la fouce an senara alhena, mas pul que bou lendo i sabendo la buossa Associaçon ye belhica ne l die que fizo anhos merecie ls parabienes, un ramico de froles (testos de felcidades), ten tino, eisiste pur rezones mui nobres solo puode tener de bós l maior carino.
-Dezis bós mas ten-lo
Si, mas teneis que lo dezir (screbir).

I este maltraste quedasse porqui.

-Frol de las Azedas (ua yerba que nace ne l termo i anquanto stá tienra de las fuolhas se fai salada, queima un pouco mas dízen que ye buona pa las delores de stómato, quando un anda arrezinado)