01/11/09
Nun quiero
Nun quiero flores ne l miu antierro
Nun me póngan basos ne l barranco
Nun me chóren ou angradéçan
Quando yá nun sorbo l sal
Desse choro cun que nun me lhebanto
Ye agora que perciso de l oulor
De la rosa i de l jasmin
Ye agora que me quiero banhar
An stebas i alecrin
Nun quiero státuas
Na rue de la andefréncia
Nun quiero honras
Yá sien la mie perséncia
Ye agora que perciso de star
An státua eideficada
Nun quiero apuis quedar
Ne l jardin ou ne l museu
Sola, frie i dezolada
Nun quiero las flores apuis
Nun stragueis buosso jardin
Ouferecei-me-las todas agora
Rosa brabas sien fin
Presas an lhaços de setin
Subscrever:
Enviar feedback (Atom)
7 comentários:
Buonas nuites Delaide,
Si scribis bien i cun santimiento.
Ler e refletir subre ls buossos poemas ye uma terapie pa l cuorpo i pa la sprito.
Bien haia.Un abraço.
Buonas nuites Delaide,
Si scribis bien i cun santimiento.
Ler e refletir subre ls buossos poemas ye uma terapie pa l cuorpo i pa la sprito.
Bien haia.Un abraço.
Agora antendo porque hai tanta garbanceira. Quando bir ua cun flores yá sei a quien las mandar ... cun lhaços de trobisco.
Guapo:)
un chi grande
Bien haias Francisca.
Esso mesmo Abelhón, flores de garbanceiras cun lhaços de trobisco para que las chiçpas nun béngan a mie nas trunadas. Ls frutos de las garbançeiras tamien me puodes dar que son guapíssemos.
Beisicos a dambos ls dous,
Delaide
Amiga Adelaide:
Agradeço-bos, cun muita satisfaçon, la buossa participaçon i de l buosso simpatico tiu Alves, ne l nuosso Magosto.
Ls zenizienses fiquemos chenos de proua i anriquecidos, porque falestes siempre na nuossa lhéngua mirandesa, i assi, cuntribuistes para balorizar la nuossa eidentidade de mirandeses.
Dou-bos tamien ls parabienes por este guapo poema i pul que screbiste non die 30 de Outubro, “Dai-me talento”, cun delerosas berdades de la realidade de las mulhieres, que bós quereis boziar.
Cumo diç Francisca Carvalhal “si scribis bien i cun santimiento”.
De la buossa cabeçica naçan poemas i testos ancantadores.
Ye mieu deseio cuntinuar a oubir la buossa linda boç an todos ls nuossos ancuontros.
Leonardo
Carai Lionardo, anté me deixas quelurada cun las tues palabras. Bien haiades por tan bien mos acolherdes.Ls belhós staban dibinales! Calientes i buonas, calenticas..nanana..na brasa.., yá nun sei más.
Beisicos amigo.
Delaide
Buons dies Delaide,
Guapos bersos que mais ua beç boteste. You tamien sou de la tue oupenion. Hai que tratar bien ls entes queridos anquanto acá stan. Apuis de muortos nun bal de nada lheba-le muitas flores.
Un abraço,
Francisco
Enviar um comentário