Al lhado, ua flor

Sinto l tou oulor
L bater de l tou coraçon
Lhadeira arriba
L aire que nun antraba
No tou peito oufegante.
Sento-me no çponer de l sol
Cuntigo
A la tardechica serena
I ancarrapito-me na naciente
Nas tues madrugadas sien suonho.
Adonde stás?
Pressinto-te, mas nun te ampalpo.
Nó!
Nun ye no semitério que te percuro
Nien ye alhá que te quiero ber
Inda que cubierto de carbalhas
I arrodiado de piedras i reponsos.
Por fabor bos pido
Nun me fórcedes a ir ende…
Retratos an piedras
Dezires que nada dízen
Pedragulhos
Flores de plástico zbotadas
Muntones de carbalhas.

Camino cuntigo
Perseguindo suonhos
Cheirando flores
Grabando cantares de páixaros.
Paro cuntigo
A ouserbar la bacalhoura
A andar a remissacos
A ber na tierra molhada
La pisada
Dua cabra muntesa
Ou l scarbar de la coquelhada.
Fujo cuntigo
De l nial de las abiespuras
Cun miedo que te inche la cara.
Sento-me cuntigo
No puial
Pa l café de la manhana.
Al lhado de la chábena
Ua flor perfumada.

Sien pedragulhos
Sien carbalhas
Sien mensaiges copiadas.